Төв аймгийн Алтанбулаг сумын Булгийн тохой буюу Шувуун фабрик орчмоос өнгөрсөн дөрөвдүгээр сарын 28-ний өдөр үл таних хүний шатсан цогцос олдсон талаар бид мэдээлсэн. Тэгвэл өнөөдөр энэ хэргийн талаар Мөрдөн
байцаах газрын онц хүнд гэмт хэрэгтэй тэмцэх хэлтсийн ахлах мөрдөн
байцаагч Б.Эрдэнэбат мэдээлэл хийлээ. Тэрээр “Цогцос нь 40 орчим насны,
эрэгтэй, үүдэнд шүд бүрэн, уруул дээр болон доор оочин сахалтай, 168 см өндөртэй. Биеийн ихэнх хэсэг нь шатаж, зарим хэсэг нь алга болсон байдалтай олдсон” гэж онцлог шинж тэмдгийг мэдээллээ.
Мөн дээд
эрүүндээ 11 ширхэг шүдтэй, зүүн 1-3 дугаар их араа хуучин байхгүй, зүүн
1 дүгээр соёо шүд эмчилгээний “пломбо” тавигдсан, шүдний эгнээ жигд бус
гурвалжин хэлбэртэй. Доод эрүүндээ 11 ширхэг шүдтэй, зүүн 3 дугаар их араа “пломбо” тавигдсан. 3 дугаар их араа хуучин байхгүй, үүдэн 1 шүд, баруун 1-3 дугаар их араа хуучин байхгүй содон шинж тэмдэгтэй аж.
Эл хэрэг дээр Цагдаагийн ерөнхий газрын
Гэмт хэрэгтэй тэмцэх албаны даргын тушаалаар ажлын хэсэг байгуулагдан
мөрдөн байцаалтын ажиллагаа явуулж байгаа аж. Албанынхны өгсөн мэдээллээр тус цогцос түймэрт бус гадны нөлөөтэйгээр шатсан байж болзошгүй аж. Тиймээс шалгалтын хэсэг цогцсыг хэзээ авчирч шатаасан болохыг тогтоохоор биечилсэн сурвалжлага явуулж байгаа юм байна.
Анх цогцсыг Хан-Уул дүүргийн 13 дугаар
хорооны оршин суугч Д олж өнгөрсөн гуравдугаар сарын 16-ны өдөр
мэдэгдсэн бөгөөд тухайн үед зүүн гар нь байхгүй, шатсан байдалтай
байжээ. Хэргийн талаарх мэдээллийг цагдаагийн байгууллага төлбөртэй авна, нууцлалыг хадгалахаа мэдэгдлээ.
Түүнчлэн хэргийн газрын үзлэгээр:
-Босоо хар өнгийн судалтай дотуур өмд, цамцны мэт тасархай,
-MONTANA гэсэн бичигтэй жинсэн өмднийх байх боломжтой нэг ширхэг товч мэт зүйл
-Ажлын гутал байх боломжтой гутлын төмөр
хоншоор, гутлын улны метал хамгаалалт, гутлын үдээсний гогцоо мэт 13
ширхэг төмөр зүйлсийг хураан авсан” гэв.
Иргэд та бүхэн дээр дурдсан цогцостой
адил содон шинж тэмдэгтэй, оршин суух газраасаа сураггүй алга болсон,
удаан хугацаагаар холбоо бариагүй, магадгүй гэрээсээ гараад дэмий тэнээд
явчихдаг хаана байгаа нь одоо болтол мэдэгдэхгүй байгаа ар гэр,
хамаатан садан нь сураглаж байгаа хүн байвал цагдаагийн байгууллагын 7027102 болон 99165377, 99053941 дугаарт холбогдож мэдээллээ өгөөрэй.