Улаанбаатар хотыг Эко хот болгох зорилготой уялдуулан хүүхдээ цэцэрлэг, сургуульд хүргэж өгөх, авах зориулалтай 2-3 хүний суудалтай цахилгаан эко машин хийхээр төсөл эхлүүлжээ. Байгаль орчинд ээлтэй, эдийн засагт хэмнэлттэй энэ машины загварыг дизайнер Д.Эрдэмбилэг бүтээсэн байна. Улаанбаатар хотын замын хөдөлгөөнд оролцож байгаа нийт машины 70% нь 1-2 хүнтэй зорчдог гэсэн судалгаа байдаг. Үйлдвэрлэлийн өртгийг бууруулах зорилгоор тус машины нэг хаалгатай загварыг боловсруулжээ.
“Улаанбаатар хот эко хот болно гэдгээ зарласан. Тиймээс дэлхийн томоохон эко хотуудын төслүүд, хурлуудад оролцож явдаг болсон нь харагдсан. Үүнтэй дуу хоолойгоо нийлүүлэх уран бүтээлч хүний шаардлага гарч ирсэн, тэр тусмаа дизайнер хүний хувьд. Нэг талаасаа уур амьсгалын өөрчлөлттэй тэмцэхийн тулд дэлхий даяараа хүссэн хүсээгүй бүгд цахилгаан машин хэрэглэдэг болно. Одоо ч маш хурдацтайгаар өөрчлөгдөж, шинэчлэгдэж эхэлсэн. Тухайлбал, Япон улсын Тоёота “Mirai” нэртэй машинаа гаргасан бол АНУ “Tesla”-г гаргаж ирээд байгаа. “Tesla” бол “Firrari”-гаас хурдан цахилгаан машин шүү дээ. Энэ нь үл бүтэх, үл гүйцэлдэх санаа гэж эрдэмтэдийн эсэргүүцэлтэй тулгарч байсан бол өнөөдөр “БҮТЭХ” төсөл болгож гаргаж ирсэн. Үүнийг хийж байгаа хүн нь Элон Маск гэж тэрбумтан байна. Тэрээр Монгол улсыг эдийн засаг болоод байгалийн баялгийн байршлын хувьд сонирхолтой, зөв гэдэг утгаар нь маш их сонирхдог. Бизнесмен болоод дизайнерууд хамтран энэ сайхан бололцоог ашиглах ёстой учраас эко машин буюу цахилгаан машиныхаа анхны төсөл, хувилбараа анхдагч шатанд, зөвхөн төсөл хэлбэрээр хийгээд явж байна. Үүнийг цааш нь хөгжүүлээд явах ёстой” гэж динайзер Д.Эрдэмбилэг ярилцлагадаа онцолжээ.
Мөн үнийн хувьд “БНХАУ-ын зах зээлийг судалж үзэхэд 1500 ам.доллар л байх юм билээ. Бид мэдээж монголчууддаа дасгахын тулд, уур амьсгалдаа зохицсон байдлаар хийхийн тулд өөрчлөлт хийснээр үнэ өсөх байх. Гэхдээ “Приус” машинаас хямдхан байж таарна. Ямар нэгэн банкны зээл, лизинг, татварын хөнгөлөлт, нийслэл хотын хөнгөлөлт, эко машины тухай дэлхийн томоохон төслүүдээс дэмжлэг авбал илүү хөнгөлөгдөж, айл өрх болгонд хүрэх болно. Энэ бол баталгаатай” гэж тэрбээр ярьсан байна.