Монгол Улсын Ерөнхийлөгчийн зарлигаар 2010 оноос эхлэн жил бүрийн тав, аравдугаар сарын хоёр дахь долоо хоногийн бямба гариг бүр бүх нийтээр мод тарьдаг уламжлалтай. Тэгвэл “Мод тарих үндэсний өдөр”-тэй болсноос хойш Монгол орны хэмжээнд нийт 9 сая орчим мод тарьсан байна. Үүний 70 хувь нь ургажээ.
Энэ жилээс тарьсан мододыг цахим бүртгэлжүүлж, тарьсан мод бүрт QR код бүхий чип зүүж, холбогдох мэдээллийг цахим санд байршуулах шинэ үйлчилгээг Үндэсний цэцэрлэгт хүрээлэн нэвтрүүлжээ. Ингэснээр тухайн модны чип дэх кодыг гар утас болон цахим төхөөрөмжөөр уншуулахад хэн, хэзээ тарьсан талаар болон тухайн модны талаар холбогдох бүхий л мэдээллийг авах боломжтой аж.