ИХ дахь МАН-ын бүлэг өнөөдрийн хуралдаанаараа нийт гурван асуудлыг хэлэлцсэн байна. Сонгуулийн тойрог байгуулах, тойрог мандатын дугаар, нутаг дэвсгэрийн төвийг тогтоох, Прокурорын байгууллагын тухай хууль, Татварын багц хуулиудын талаар хэлэлцэж, нэгдсэн шийдвэрт хүрчээ.
Тухайлбал, сонгуулийн тойрог байгуулах асуудлын тухайд “Тойрог, мандатын тоог тогтоохдоо Засаг захиргаа, нутаг дэвсгэрийн хэмжээ, хүн амын тоо зэрэг хүчин зүйлийг харгалзаж тогтоох ёстой гэж Монгол Улсын Үндсэн хууль болон Сонгуулийн хуульд заасан байдаг. Үүнээс үүдэн манай бүлэг жагсаалтын 28 мандатын 20-ыг нь хөдөөд, хотод 8-ыг нь хуваарилах гэсэн зарчмыг баримталж байсан. Харамсалтай нь АН-аас хөдөөд 14, хотод 14 гэсэн хатуу шаардлагыг тавьж байна. Гэхдээ бид буулт хийж болох юм. Хөдөөгийн нэг мандаттай бүх аймгууд хоёр мандаттай болох ёстой гэж манай бүлэг үзэж байна. Тэгэхээр 16-18 мандат хөдөөд 10-12 мандат хотод хуваарилах ёстой гэж ярьж болох юм” гэж сэтгүүлчдэд хийсэн мэдээллийн үеэр С.Бямбацогт гишүүн хэлж байв.