Мэдээллийн технологи хөгжөөд сайхан л байна. Харин ямар ч шинэ зүйл заавал сөрөг талтай. Олон нийтийн сүлжээ хэдийгээр хол байгааг ойртуулдаг ч ойр байгааг нь харин холдуулчих гээд байдаг гэхэд хилсдэхгүй. Олон нийтийн сүлжээний гол төлөөлөгч болох фэйсбүүкийг Монголд бараг хүн бүхэн ашиглаж байна. Хүнд өгөөжтэй, амьдрал ахуйдаа хэрэгжүүлэхээр гоё сайхан санаанууд, зөвлөгөө гээд аятайхан зүйлс хэдэн мянгаараа байх нь таатай л даа. Гэвч тэр хэрээр янз бүрийн үнэн худал нь эс мэдэгдэх мэдээллүүд ёстой нэг урсах шиг болдог болжээ. Фэйсбүүк хэрэглэгчдийг хүсэл зорилго, санаа бодлоор нэгтгэдэг группууд, хуудсууд ч үй олноороо. Харин тэдгээрт харж үзэхэд нүд халтирам видео бичлэг, зургууд маш ихээр шэйрлэгдэж байгаа нь асуудал болж болзошгүй болж байх шиг.
Мал адгуус, амьтдыг хайр найргүй тамлаж алж байгаа, хүний толгойг шууд тасалж байгаа мэтийн хүний сэтгэхүйд нөлөөлж болзошгүй бичлэг, материал сэлтийг угтаа тухайн групп, хуудасны админ нь хянаж устгаж байх ёстой юм. Ер нь хамгийн гол асуудал нь насанд хүрэгсэд хүртэл үзээд айдас төрж болох материалыг өсвөр болон бага насны хүүхдүүд үзэж байгаад учир байна.
Багаасаа тиймэрхүү зүйлийг үзэж хараад нүд нь дасчихвал тэр хүүхэд ирээдүйд энэрэх хайрлах сэтгэлийн өчүүхэн ч сэмэрхийгүй хэрцгий нэгэн болж хувирахыг үгүйсгэх аргагүй.
Цаашлаад энэ мэтээр дамжаад янз бүрийн хууль бус асуудалд ч орооцолдохыг үгүй гэх газаргүй. Өсвөр, бага насны хүүхэдтэй эцэг эхчүүд байнга биш юм гэхэд хааяадаа хүүхдийнхээ яг юу сонирхоод үзэж хараад байдгийг нь шалгачихдаг байхад буруудахгүй. Бас тиймэрхүү бусармаг мэдээ сэлтийг фэйсбүүк рүү “энэ ёс бус мэдээлэл байна аа” гээд репорт явуулчихдаг байх хэрэгтэй юм л даа.