Азербайжаны нийслэл Баку хотноо жүдо бөхийн “Их дуулга” тэмцээн өчигдөр эхэлсэн билээ. Тэмцээний эхний өдрийн байдлаар манай улсын баг тамирчид гуравдугаар байрт явж байна.
Өчигдөр эрэгтэй 60 кг, 66 кг, эмэгтэй 48, 52, 57 кг-ын жингийн барилдаан болж, медальтнууд тодорсон юм. Манай бөхчүүдээс эрэгтэйчүүдийн 60 кг-ын жинд дэлхийн аварга, Гавьяат тамирчин Г.Болдбаатар түрүүлж, чансааны 500 оноог аван, дэлхийн чансааг тэргүүлэхээр болж байна. Мөн энэ жинд барилдсан Д.Амартүвшин шагналт V байр эзэллээ. Харин эмэгтэйчүүдийн 52 кг-д гавьяат тамирчин М.Бундмаа барилдаж, хүрэл медаль хүртэв. М.Бундмаа гавьяат 2013 оны Дэлхийн аваргын мөнгөн медальт, 2014, 2015 оны дэлхийн хошой хүрэл медальт Бразилийн Эрика Мирандаг ялсан юм.
Өнөөдөр эрэгтэй 73, 81 кг, эмэгтэй 63, 70 кг-ын жингийн барилдаан болно. Манай улсаас эрэгтэй 73 кг-д олимп, дэлхийн аваргын хүрэл, дэлхийн аваргын багийн хүрэл медальт Гавьяат тамирчин С.Ням-Очир, эмэгтэй 70 кг-ын жинд Ц.Наранжаргал нар барилдах юм.
