Одоогоор чуулганы танхимд 38 гишүүн хүрэлцэн ирсэн байгаагаас найм нь УИХ дахь Ардчилсан намын бүлгийн гишүүд юм. Иймээс МАН-ын бүлгийн гишүүд эрх баригчид ирцээ бүрдүүлэх ёстой гэсэн шаардлага тавилаа. Хурал даргалагч Р.Гончигдорж “Ирцэнд нийт 43 гишүүн орсон байсан” гэдэг тайлбар хийв.
Мөн УИХ-ын гишүүн Ж.Энхбаяр: УИХ-ын чуулган өндөрлөх тал руугаа хандаж байгаа, эрх баригчид ирцээ бүрдүүлээч ээ. Сүүлдээ 7-8 гишүүн хууль баталдаг боллоо. Эрүүгийн хуультай холбоотой ноцтой асуудлууд тун хайхрамжгүй гарлаа. Ирц бүрдүүлэхгүйгээр УИХ-ын үйл ажиллагааг үргэлжлүүлж болохгүй.
УИХ-ын дэд дарга Р.Гончигдорж: Анхааруулгыг анхааръя.
УИХ-ын гишүүн Г.Уянга: Энэ долоо хоногийн УИХ-аар хэлэлцэх асуудлын жагсаалтад Ерөнхийлөгчтэй холбоотой асуудлыг хэлэлцэх ёстой байсан ч УИХ-ын Хууль зүйн байнгын хорооны хуралдаанаар энэ асуудлыг хэлэлцэх үед МАН-ын бүлэг завсарлага авсан. Хууль зөрчиж завсарлага олгосон байна. Ийм учраас энэ асуудлыг хэлэлцэх асуудлын жагсаалтад оруулж өгөөч ээ. Тавантолгойн хувьцааг зарж байгаа асуудал нь олон нийтийн бөөгнөрөл үүсгээд байна. Худал буруу мэдээлэл тараагаад яваад байна. Энэ талаар Засгийн газраас тодорхой мэдээллийг чуулганд хиймээр байна. Шударга ёс эвслийн бүлэг өчигдөр байхгүй боллоо. Монгол Улсын Засгийн газар байна уу, үгүй юу. Засгийн газар байхгүй болсон бол Засагтай болмоор байна.
УИХ-ын дэд дарга Р.Гончигдорж: Хууль зүйн байнгын хорооноос намын бүлэг завсарлага авсан учраас энэ асуудлыг байнгын хороогоор ярих ёстой. Тавантолгойн хувьцаатай холбоотой асуудлыг Засгийн газар сонсож байгаа байх. Албан ёсоор УИХ дээр албан ёсны мэдээлэл хийчих нь зөв байх.
УИХ-ын гишүүн Л.Энх-Амгалан: УИХ-ын чуулганаар хэлэлцэх асуудлын жагсаалтад Эрүүл мэнд, спортын сайдыг томилох асуудлыг оруулъя. УИХ-ын Нийгмийн бодлого, боловсрол, соёл шинжлэх ухааны байнгын хороогоор өчигдөр энэ асуудлыг хэлэлцэх ёстой байсан, УИХ дахь МАН-ын бүлгийн 6 гишүүн бүгдээрээ хуралдаандаа ирээд 1 цаг гаруй хүлээсэн. Эрх баригчдаас нэг ч гишүүн орж ирээгүй. Байнгын хорооны дарга нь өрөөндөө байдаг, гэтэл орж ирдэггүй. Хамгийн тэргүүнд хэлэлцэн томилох ёстой сайдын асуудал дээр яагаад улс төрийн тоглолт хийгээд байгаа юм бэ. Шударга ёс эвслийн бүлэг нь бүлэггүй болчихлоо гээд Эрүүл мэндийн сайдын томилгоог татаад авчхаж байгаа юм уу эсвэл. Ингэж хардахад хүргэж байна. Эрүүл мэндийн салбар эзэнгүй, 60 хүүхэд улаан бурхан өвчнөөр амиа алдаж, олон зуун иргэн эрүүл мэндээрээ хохирч байна. Онцгой байдал зарлахаас аргагүй салбар болсон. Сайдыг нь яаралтай томилъё л доо.
УИХ дахь МАН-ын бүлгийн дарга С.Бямбацогт: Завсарлагыг хууль зөрчиж аваагүй. Хуваариараа УИХ-ын Хууль зүйн байнгын хороо лхагва гаригт хуралдах ёстой байсан ч мягмар гаригт гэнэт зарлан хуралдуулсан. Түүнд нь МАН-ын бүлгээс нэг ч гишүүн байгаагүй, дээр нь хэлэлцэж байсан хуулиудтай холбоотой асуудал бас хөндөгдөж эхэлсэн учраас бүлэг завсарлага авсан.
УИХ-ын гишүүн Д.Ганбат: Хууль тогтоох ажлаа байнгын хороо хийх ёстой. Ардын намын бүлэг хуулийн дагуу завсарлага авсан. Бүлгийн дарга С.Бямбацогт, бүлгийн дэд дарга Н.Номтойбаяр нар нь завсарлага хүссэн. Манай байнгын хороо ихэвчлэн мягмар гаригт хурлаа хийдэг. Лхагва гаригт чуулгантай байсан учраас асуудлаа хэлэлцэхээс аргагүй байсан. Шүүх байгуулах тухай хуулийг зургадугаар сарын 1-нээс өмнө хэлэлцэхгүй бол шүүхгүй болчих гээд байгаа. Манай байнгын хороо хариуцлагатай байнгын хороо. УИХ дахь МАН-ын бүлгээс Ц.Нямдорж, Д.Лүндээжанцан нар байнгын хорооны хуралдаандаа сайн оролцдог. Манай бүлгийн гишүүд 100 хувь оролцдог. Хааяа нэг тойрогтоо ажиллахаар явахаар араас их сурах юм. яасан хайртай болчихсон юм бэ, та нар гэж байр сууриа тус бүр илэрхийлэв.
Шүүх байгуулах тухай асуудлыг хэлэлцэж эхлээд байна.