Улаанбурхан өвчинтэй хүүхдүүдэд туслахаар Австри улсад ажиллаж амьдардаг монголчууд тус өвчний үед хэрэглэдэг утлагын аппаратыг илгээсэн байна. Гэтэл Буянт-Ухаа дахь гаалийн хүнд суртлаас болж 10 хоногийн турш аппаратуудаа авч чадахгүй, гацаад байна гэж иргэн Ж.Эрхэмбаяр өөрийн цахим хуудсаараа дамжуулан мэдээллэсэн юм.
Уг хандивын ажлыг санаачилсан иргэнээс Гаалийн газрынхан Эрүүл мэнд, Сангийн яамнаас албан бичиг болон тусгай зөвшөөрөл авч ирэхийг шаардсан гэх мэдээлэл бий. Энэ дагуу иргэн Ж.Эрхэмбаяр шаардсан бичгийг авахаар яам, агентлагуудад удаа дараа хандсан ч өнөөдрийг хүртэл шийдэгдээгүй гэдэг. Өчигдөр тэрээр энэ асуудлаар Эрүүл мэнд, спортын яамны Төрийн нарийн бичгийн дарга С.Ламбаад хандсанаар 3-5 хоногт гардаг лицензийг 30 минутад гаргуулж чадсан юм. Ийнхүү тэд өчигдөр орой зургаан аймгийн эмнэлэг болон ХӨСҮТ-д хандивын аппаратуудаа хүлээлгэн өглөө.