Японы мэргэжлийн сумо бөхийн дэвжээнд олон жил барилдаж байгаа Токитэнкү А.Хүчитбаатар цусны хорт хавдар тусаад байгаа юм. Түүний эмчилгээнд зориулж дээд зиндаанд барилдаж буй бөхчүүд хандив цуглуулж, уг хандивыг ёкозуна Хакухо М.Даваажаргал бусдыгаа төлөөлөн А.Хүчитбаатарын ээжид хүлээлгэн өгсөн байна. Токитэнкү А.Хүчитбаатар өнгөрөгч оны долдугаар сард бэлтгэлийн үеэр хавиргаа гэмтээж бэртэлээ эмчлүүлэх явцдаа хорт хавдар гэдгийг мэджээ. Онош тодорсноос хойш хавдрын эсрэг эмчилгээ хийлгэж эхэлсэн ба энэ хугацаанд 20 гаруй кг жин хаяад байгаа аж. Тэрээр “Өвчнийг эхний шатанд нь илрүүлсэн учир эмчилгээ үр дүнтэй болно гэдэгт итгэж байгаа. Адилхан өвчнөөр шаналж байгаа бусад хүмүүсийн төлөө заавал эдгэрнэ” гэжээ. Токитэнкү одоо Япон улсад эмчлүүлж байгаа ба Монголоос ар гэрийнхэн нь очоод байгаа юм.