“Өдрийн сонин”-ы пүрэв гаригийн дугаар 16 нүүрээр хэвлэгдэн уншигч та бүхний гар дээр очлоо. Эрүүл мэнд спортын яамны Төрийн нарийн бичгийн дарга С.Ламбаагийн “Эрүүл мэндийн салбарыг намчирхлаас ангижруулах хэрэгтэй байна” хэмээх ярилцлага, Нийслэлийн Засаг дарга Э.Бат-Үүлийн “Гэр хорооллын дахин төлөвлөлтийн төсөл” сэдвийн хүрээнд сэтгүүлчидтэй хийсэн зангиагүй уулзалт зэрэг цаг үеийн сонирхолтой нийтлэлийн дэлгэрэнгүйг өнөөдрийн манай дугаараас уншаарай. Гуравдугаар нүүрт орсон “Б.Цэнддоогийн “Сүм, лам хоёр: сүсэгтнээ дагах нь ёс” нийтлэлд “… Ухаандаа, нийгэмд дэвэрч болох байсан үл итгэлцэл, алдагдсан найдвараас үүсэлтэй сэтгэл хөдлөлийг амарлиулж, анх удаа хувь заяагаа өөрөө хариуцах болж байгаа мянга мянган хүнд горьдлого итгэлийн багана болох үүргээ лам, бөө хоёр биелүүлсэн санагдана. Өнөөдөр шашин шүтлэгийн хувьд эрүүл шинэ үе ирж байна. Хүмүүсийн амьдрал сайжирч, баялаг бүхий ирээдүй бодитой болохын хэрээр шашин нь хүний сэтгэл санаа төгс төгөлдөр болгох үндсэн үүрэгтээ орох боломж гарч байна … 1990 оны ардчилсан хувьсгалаас бид Коммунист шүтээн юугаан шашин, мөргөлөөр орлуулах оролдлого хийсээр ирсэн бололтой …” хэмээн бичжээ.
“Нүүрс” хөтөлбөрөөс их хэмжээний мөнгө хувьдаа завшиж шамшигдуулсан хэргээр Л.Гансүх нарын гурван хүнд холбогдох хэргийг Улсын дээд шүүх өчигдөр хэлэлцэн шийдвэрээ гаргалаа. Л.Гансүхэд 3,6 тэрбум төгрөг завшсан гэх үндэслэлээр анхан болон давж заалдах шатны шүүхээс 4.6 жилийн хорих ял оноосон байсныг 3.6 жил болгон бууруулжээ. Б.Мөнгөнтуяад мэргэжлийн ажил хийх эрхийг хоёр жилээр хасч, хөдөлмөрийн хөлсний доод хэмжээг 100 дахин нэмэгдүүлсэн буюу 19 сая 200 мянган төгрөгөөр торгох ял оногдуулсныг хэрэгсэхгүй болгожээ. Н.Даваахүү, Л.Гансүх нараас 1.1 тэрбум төгрөгийг хувь тэнуүүлэн гаргаж “Багануур” компанид олгуулахаар болжээ. Дэлгэрэнгүйг долдугаар нүүрнээс уншаарай.
МУГЖ С.Жавхлан, Т.Баясгалан нарын “Илгээлтийн эзэд” хандивын цуваа замдаа гарлаа” сурвалжлагыг манай сонины зургадугаар нүүрнээс уншаарай. Өвөрхангай аймгийн Засаг дарга Д.Тогтохсүрэн өнгөрсөн сар шинийн баяраар өөрийн мэндчилгээ, зураг бүхий цаг тооны бичгийг тарааж, Сонгуулийн хууль зөрчжээ. Энэ талаарх дэлгэрэнгүйг 11 дүгээр нүүрнээс уншаарай. УДБЭЧ-ын дуучин, СТА С.Цогтсайханы “Би Алтан Богдын шилийг дуулах дуртай”, саяхан 16-19 нас буюу өсвөр насны дэлхийн супер моделиор шалгарсан загвар өмсөгч Т.Шинэтуяагийн ээж Г.Цогзолмаагийн “Охиноо ялагч болоход нулимс дуслуулж суулаа” хэмээх ярилцлагуудаас гадна цаг үеийн онцлох мэдээ мэдээллүүд өнөөдрийн “Өдрийн сонин”-д багтлаа.