МАХН-ын Хяналт ёс зүйн хорооноос мэдээлэл хийж Эрүүл мэнд, Спортын сайд асан Г.Шийлэгдамба, МАХН-ын гишүүн Булган аймгийн МАХН-ын Мянгатын дарга асан С.Дашдондог, УИХ-ын гишүүн, УИХ-ын дэд дарга Л.Цог нарыг намынхаа гишүүд, дэмжигчдээс уучлал гуйхыг шаардлаа. МАХН-ын Хяналт ёс зүйн хорооны дарга Г.Давааням “2015 оны сүүлээс ялангуяа МАХН, МАН эвсэж хамтарч ажиллахыг санал болгосон хоёр намын нэр бүхий 42 ахмадын гарын үсэг эурсан мэдэгдэл гарсанаас хойш, улс төрийн зарим хүчин төрийн зарим өндөр албан тушаалтаны зүгээс МАХН-ыг хардах, сэрдэх хавчин гадуурхах болсон. Тэд МАХН-ын дарга Н.Энхбаяр болон МАХН-ын нэр хүнд өсөхөөс айж элдэв хилс хэрэг тохохын төлөө авхаалж самбаагаа сорин өрсөлдөх боллоо. Түүний эхнийх нь Засгийн газрын гишүүн Эрүүл мэндийн сайд МАХН-ын ЕНБД асан Г.Шийлэгдамбыг хувийн хэрэгцээндээ сайн танил дотны нөхөр О.Даваасүрэнгээс зээлсэн мөнгө албан өрөөндөө хадгалж байсныг, авлига авч өгч байх үед нь газар дээр нь гардан баривчилсан мэт нийгэмд ташаа мэдээлэл цацсан. Улмаар уг мөнгийг Н.Энхбаяр дарга намын санхүү бүрдүүл гэж шахсаны дагуу зээлж зарим хэсгийг нь Н.Энхбаярт өгсөн мэтээр мэдүүлэг өгүүлэх зэргээр Г.Шийлэгдамбыг анхны мэдүүлгээсээ няцах өмгөөлөгчдөөсөө татгалзах хүртэл дарамт шахалт үзүүлсэнээр илэрсэн. Түүнчлэн МАХН-ын гишүүн Булган аймгийн МАХН-ын Мянгатын дарга асан С.Дашдондог, УИХ-ын гишүүн УИХ-ын дэд дарга Л.Цог нар сүүлийн үед хэвлэл мэдээллийн хэрэгслээр МАХН-ын эсрэг гүтгэлгийн шинжтэй таагүй мэдээллүүд цацаж байгаа. Иймд Г.Шийлэгдамба, Л.Цог, С.Дашдондог нарыг гаргасан алдаагаа гэмшин хүлээж намын хамт олноос уучлал гуйхыг албан ёсоор шаардаж байна. Хэрвээ уучлал эс хүсвэл намын дүрмийн дагуу төрийн болон улс төрийн албан тушаал хаших, УИХ-ын сонгуульд нэр дэвшихэд нь улс төрийн дэмжлэг үзүүлэхгүй болохыг мэдэгдэж байна” гэлээ.