АНУ болон БНСУ-ын хамтарсан том хэмжээний цэргийн сургуулилт Солонгосын хойгт өнөөдөр эхэлж байгаа аж. Энэ жил “Key Resolve” болон “Foal Eagle” цэргийн сургуулилтад нэгэн зэрэг болж, Өмнөд Солонгосын 300 мянга гаруй цэрэг, АНУ-ын 15 мянган алба хаагч оролцож байна. Энэ нь өмнөх жилүүдийнхээс оролцох цэргүүдийн тоо хоёр дахин нэмэгдсэн үзүүлэлт юм.
Хаврын уламжлалт хамтарсан цэргийн сургуулилт нь Хойд Солонгосын зүгээс хүчтэй эсэргүүцэл дагуулдаг. Хамтарсан цэргийн сургуулилтын өмнө өчигдөр Пхеньяны талаас Өмнөд Солонгос дахь Америкийн цэргийн баазуудыг сөнөөнө” хэмээн сүрдүүлжээ. Пхеньян өнгөрсөн нэгдүгээр сард цөмийн туршилт хийж, дараа нь хиймэл дагуул зөөгч пуужин хөөргөсний хариуд АНУ болон Өмнөд Солонгос улс том хэмжээний хамтарсан цэргийн сургуулилт хийж байна.
Хойд Солонгосын цахим халдлагын эсрэг “Key Resolve” сургуулилалт долоо хоногийн хугацаатай үргэлжлэх аж. Энэхүү цэргийн сургуулилт Хойд Солонгосын цөмийн пуужингийн аюул заналхийллийн эсрэг “4D” стратегийн дагуу явагдах гэнэ. “4D” стратеги нь “detect-илрүүлэх, defend-хамгаалах, disrupt-таслан зогсоох, destroy-устгах” юм.
Харин “Foal Eagle” нь тэнгис, агаар, газраар хийгдэх цэргийн сургуулилалт бөгөөд дөрөвдүгээр сарын 30-ыг хүртэл үргэлжлэх аж. Энэ үеэр АНУ-ын “B-2” сөнөөгч, цөмийн шумбагч, “USS John C. Stennis”, “Nimitz” ангиллийн нисэх онгоц тээвэрлэгчийг ашиглах гэнэ.