Хятадын засгийн газраас Түвдэд ирэх гуравдугаар сарыг дуустал гадаадын жуулчдыг хүлээж авахыг зогсоожээ. Лхаст 2008 онд Бээжингийн дарангуйллын эсрэг бослого өрнөснөөс хойш жил бүрийн энэ үед Түвдийг дэлхий нийтээс тусгаарлах болсон юм. Хятадын засгийн газраас Түвдэд бослогын ойгоор дахин үймээн дэгдсэн тохиолдолд гадаадын жуулчид олон улсад мэдээлэл дамжуулах эх сурвалж болно хэмээн үзэж аяллыг хориглож байгаа аж.
Түвдийн автономит бүсийн аялал жуулчлалыг хөгжүүлэх хорооноос мэдээлснээр өнгөрсөн онд 17.5 сая жуулчин ирсэн нь өнгөрсөн оныхоос 36 хувиар нэмэгдсэн гэнэ.
Бээжинг эсэргүүцсэн Түвд лам нар өөрийгөө шатааж, амьдаараа зулын гол болох нь элбэг юм. Бээжин лам нарын үйлдэлд Бурхны шашны тэргүүн Далай ламыг өдөөн хатгасан хэмээн буруутгадаг. Далай лам Хятадын эсрэг Түвдийн тэмцэлд ялагдсанаар эх орноосоо дүрвэж, 1959 оноос хойш Энэтхэгийн Дарамсалад шашин номын үйл хэргээ явуулж буй юм.