Бүртгэл статистикийн ерөнхий газар иргэдийн гадаад паспортыг шинэчлэх ажлыг энэ оноос эхлүүлэхээр боллоо. Ингэснээр монгол иргэдийн гадаад паспорт олон улсын стандартыг хангах аж. Монголд 2002 болон 2006 оны загвар бүхийг гадаад паспортыг хилээр давахдаа ашигладаг. Гэтэл эдгээр загваруудад чип байдаггүй, мөн хугацааг нь сунгахдаа улсын бүртгэгчид гараар бичилт хийдэг зэргээр цаг үе, дэлхийн стандартаас хоцрогдсон. Тиймээс Монгол Улс энэ оны сүүлээр иргэдийнхээ гадаад пасспортыг чиптэй хувилбараар шинэчлэхээр төлөвлөөд байна.
Олон улсын иргэний нисэхийн газрын зөвлөмжийн дагуу 2015 онд Гадаад хэргийн сайд чиптэй гадаад паспортын загварыг баталсан. Улмаар чиптэй гадаад паспортын тендерт Унгар Улсын Үнэт цаас, мөнгөн тэмдэгт үйлдвэрлэлийн компани ялсан байна. Унгарын ерөнхий сайдын өнгөрөгч айлчлалын үеэр хоёр тал хамтын ажиллагааны гэрээгээ байгуулсан ба одоогоор хоёр тал паспортын бэлдэц хүлээн авах ажлаа эхлүүлээд байгаа юм байна.
Шинэ гадаад паспортыг энэ оны сүүлийн хагасаас хэрэглээнд оруулахаар төлөвлөжээ. Гэхдээ иргэн бүр заавал чиптэй гадаад паспорт авахыг шаардахгүй юм. Өндөр нууцлалтай, чиптэй паспорт авах уу, эсвэл хуучин хувилбараа хэрэглэх үү гэдгээ иргэд өөрсдөө шийдэх боломжтой.
Шинэчилсэн паспортын хувьд чиптэй гэдэг утгаараа өндөр нууцлалтай. Хоёрдугаарт, сунгалт хийлгэх шаардлагагүй бөгөөд шинэ гадаад паспортын үнэ хэдэн төгрөгөөр тогтоогдох асуудал тодорхой бус байна.