“Говийн чоно-2016” газар хөдлөлтийн гамшгийн хор уршгийг арилгах олон улсын хамтарсан сургалт, дадлагын бэлтгэл ажлын хүрээнд “Орчны шинжилгээний уулзалт”-ыг ОБЕГ болон Орхон аймагт энэ сарын 22-26-ны өдрүүдэд зохион байгуулж байна.
Уулзалтад ОБЕГ-ын дэд дарга, онцгой байдлын хурандаа Г.Ариунбуян, ЗХЖШ-ын ажиллагааны удирдлагын газрын дарга, бригадын генерал Д.Ганзориг, АНУ-ын цэргийн атташше, дэд хурандаа МаттевКент нарын албаны хүмүүс оролцож байгаа юм. “Говийн чоно” гамшгийн хор уршгийг арилгах олон улсын хамтарсан сургалт дадлага сургууль нь Монгол Улсад 5 дахь удаагаа зохион байгуулагдаж байна.
Энэ удаагийн сургалт, дадлага сургууль нь орон нутагт үүссэн гамшиг, онцгой байдлын үед Засгийн газрын түвшинд, Зэвсэгт хүчний оролцоог хэрхэн хангах, бодит нөхцөл байдалд үүсэх хүндрэл бэрхшээлийг даван туулах арга замыг шийдвэрлэх гарцыг тодорхойлохоороо онцлог юм байна.