Байс гээд л ханиад хүрээд байгаа бол биеийнхээ дархлаанд анхаарал хандуулаарай. Ихэнх өвчний суурь нь дархлаа муудсантай холбоотой байдаг гэнэ. Харин дархлаагаа дэмжихийн тулд янз бүрийн витаминыг урьтал болголгүй аль болох байгалийн гаралтай бүтээгдэхүүн хэрэглэхийг зөвлөе.
Тухайлбал, цагаан гаа хүний биед тун ашигтай. Цагаан гааг төрөл бүрийн хоолонд хийж идвэл дархлаа сайжирдаг ажээ. Мөн ажлын ачаалал ихтэй, ядарч сульдаад байвал битүү хоол буюу бууз, баншинд цагаан гаа хийж идэхийг уламжлалт эмнэлгийн эмч нар зөвлөдөг юм билээ. Хоолонд хэрэглэхдээ хальслах хэрэггүй бөгөөд хальс нь наршихаас сэргийлэх, элэг болон хоол шингээх эрхтнийг хамгаалах, шээс гадагшлуулах зэрэгт маш сайн. Удахгүй хаврын эхэн сар гарна.
Өдөр уртсаж цаг уярахын хэрээр ихэнх хүмүүс ядрах гээд байдаг. Тэр үед хоол хүнсэндээ аль болох цагаан гаа өргөн хэрэглэвэл эрч хүчээ сэлбээд авна. Цагаан гааг дан ганц хоолондоо хийж хэрэглэхийн зэрэгцээ ууж болно. Цагаан гааны орцтой цай, цэвэр нунтаг гаа ч худалдааны төвүүдээр зөндөө байдаг. Янз бүрийн амин дэмтэй хольж дархлаа дэмжих зориулалттай цагаан гааны орц бүхий цайг өдөр бүр ууж хэвшээрэй. Ингэж чадвал ирэх хаврын урт өдрүүдийг эрч хүчтэй, ядарч сульдахын зовлонгүй давж чадах нь байна шүү.
Цагаан гааны ашиг тусыг эмч нар “Цусны эргэлт сайжруулдаг, цус шингэлдэг, дотор муухайралт, бөөлжилтийг намдаадаг, хордлого тайлдаг, хавдрын эсийг бууруулдаг, жирэмсний эрт үеийн хордлого тайлдаг, шар хөөрөлтийг зогсоодог, сарын тэмдэг ирэх үеийн өвдөлтийг намжаадаг, толгойн хүчтэй өвдөлтийг намдаадаг” гэж байна лээ шүү.