Баянхонгор аймгийн Мэргэжлийн хяналтын газар, Цагдаагийн газар, Хүүхэд гэр бүл хөгжлийн хэлтэс хамтран “Өвөл, хаврын морины уралдааныг хориглох тухай” мэдэгдлийг Аймаг, сумын Морин спорт уяачдын холбоо, сумдын Засаг дарга нарт хүргүүлжээ.
Энэ оны гуравдугаар сарын 5-нд говь, төв, хангайн бүсийн уралдаанууд, гуравдугаар сарын 11-нд “Номгон хайрханы хурд” уралдаан товлогдоод байсан ч тус аймгийн засаг даргын 2015 оны 164 дүгээр захирамжийн дагуу “хурдан морины уралдаан, уралдааны өмнөх үсэргээ, сунгааг жил бүрийн 02.01-05.01 хүртэлх хугацаанд зохион байгуулах, оролцохыг хориглосон” шийдвэрийг биелүүлж ажиллахыг тус байгууллагаас шаардсан байна.
Уг мэдэгдэлд “Баянхонгор аймгийн Морин спорт уяачдын холбооноос морьдын уралдааныг зохион байгуулах үед унаач хүүхдийн эрүүл мэнд, амь нас, эрх ашгийг хамгаалах, аюулгүй байдлыг хангахад чиглэгдсэн ажил учир дутагдалтай байдаг ба хамгаалалтын хувцас, морины хэрэгсэлд тавигдах MNS 6264:2011 стандартыг биелүүлдэггүй, унаач хүүхэд болон морины эзэн, эцэг эхийн хооронд гурвалсан гэрээ байгуулдаггүй зөрчлүүд хяналт шалгалтын явцад нийтлэг илэрдэг” гэжээ.
Аймаг, сумдын уяачдын холбооноос 2015 онд зохиосон өвөл, хаврын хурдан морины уралдааны үеэр хүүхдүүд осгох, хайрагдах, унаж бэртэх гэмтэх зэрэг эрсдлүүд ихээр гарч морин уралдааны замд 2 хүүхэд амь насаа алдаж, 5 хүүхэд хүндэвтэр, 42 хүүхэд хөнгөн бэртсэн байна. Тиймээс энэ оны хавар зохион байгуулахаар зарлагдсан морины уралдаануудыг цуцлах шаардлагатай хэмээн дээрх байгууллагууд ийнхүү мэдэгдэл гаргажээ.