Өнгөрсөн онд ТОСК-аас түрээсийн орон сууцыг захиалж бариулах зах зээл дээр борлогдохгүй байгаа орон сууцнаас худалдан авах замаар 1300 айлд түрээслүүлж төрийн түрээсийн орон сууцны сан бүрдүүлжээ.
Түрээсийн орон сууцны хөтөлбөр гурван өмчийн хэлбэртэй бөгөөд үүнд төрийн түрээсийн орон сууц, орон нутгийн өмчийн түрээсийн орон сууц, хувийн өмчийн түрээсийн орон сууц багтах юм. 2015 онд орон нутагт 800, Улаанбаатарт 1620 нийтдээ 2000 гаруй айлын орон сууцыг захиалж ашиглалтад оруулсан байна. Эдгээрээс зургаан аймагт нийтдээ 579 орон сууц, Улаанбаатарт “Буянт-Ухаа-2” хорооллын 350 орон сууц нийт 929 орон сууцыг төрийн түрээсийн санд шилжүүлж авахад бэлэн болжээ. Эдгээр байрны үнийг 2017-2019 онд улсын төсөвт суулган ТОСК-д гаргаж өгөхийг тогтоолд тусгасан. Төрийн өмчийн зорилтот бүлэгт чиглэсэн хөнгөлөлттэй түрээсийн бодлогыг Монгол Улсад анх удаа хэрэгжүүлэх гэж байгаа нь энэ юм. Төрийн өмчийн түрээсийн орон сууцны сарын төлбөр нь Үндэсний статистикийн хорооноос гаргасан өрхийн сарын дундаж орлогын 25 хувиас хэтрэхгүй гэж заасны дагуу баримжаа үнийг Засгийн газрын хуралдаанд танилцуулсан нь Улаанбаатарт нэг байрны үнийг сарын 200-280 мянга, орон нутагт 130 мянган төгрөг гэж тусгажээ.