“Өдрийн сонин”-ы мягмар гаригийн дугаар 16 нүүрээр хэвлэгдэн уншигч та бүхний гар дээр очлоо. Нэмүү өртгийн албан татварыг иргэдэд буцаан олгож эхэлсэнтэй холбоотойгоор өчигдөр Ерөнхий сайд Ч.Сайханбилэг “Миний” сүлжээ дэлгүүрээр үйлчлүүлсэн юм. Тэрээр арван өндөг, хар талх, сүү гээд 7350 төгрөгийн худалдан авалт хийсэн бөгөөд НӨАТ болох 20 төгрөгийг буцаан авсан байна. Хэдий бага мөнгө мэт боловч байр машин унаа худалдан авбал таны буцаан авах мөнгөний хэмжээ үүнээс хэдэн зуу, мянга дахин нэмэгдэх юм. Энэ талаарх дэлгэрэнгүйг манай сонины өдрийн сурвалжлагаас уншаарай. УИХ-ын гишүүн С.Одонтуяа Монгол Улсын урт хугацааны тогтвортой хөгжлийн үзэл баримтлал батлах тухай тогтоолын төслийг өргөн барьсантайгаа холбогдлуулан манай сонинд дэлгэрэнгүй ярилцлага өглөө. Өнөөдрийн ипотекийн найман хувийн хүүтэй зээл инфляци 14 хувьтай байхад эхэлсэн бол өдгөө инфляцийн түвшин гурван хувьд хүрсэн. Ийм нөхцөлд найман хувийн хүүг зургаа, түүнээс ч доош оруулах бүрэн боломжтой гэх санааг “Найман хувийн зээлийн хүүг бууруулах боломжтой” нийтлэлд хөндлөө. Утга зохиолын арвантавдугаар нүүрт “Болор цом”-д түрүүлээгүй ч уншигчдын сэтгэлд хоногшсон шүлгийн түүврийг багтаасан бол арвангуравдугаар нүүрт “Пароди” хамтлагийн элэглэгч Б.Нямхүүгийн сонирхолтой ярилцлага багтлаа. Мөн арвангуравдугаар нүүрт “Apple”-ийн гүйцэтгэх захирал Тим Кукийн талаарх дэлгэрэнгүй нийтлэлийг орууллаа.
Энэ мэтчилэн цаг үеийн мэдээ мэдээллийг та манай өнөөдрийн дугаараас шимтэн уншаарай.