МАН-ынхан сайд нарт “Хямралын гацуур” засч бэлэг барив

Өнгөрсөн даваа гаригт УИХ дахь МАН-ын бүлгийн дарга С.Бямбацогт сэтгүүлчдэд мэдээлэл хийх үеэрээ Засгийн газарт гэнэтийн сюрприз барихаар болсноо дуулгаж байсан юм. Тэгвэл өнөөдөр энэ гэнэтийн бэлгээ задалж, бяцхан шуугиан дэгдээгээд амжив.

УИХ дахь МАН-ын бүлгээс Засгийн газарт “Хямралын гацуур” засаж өгчээ. Төрийн ордонд зассан энэхүү гацууртаа Засгийн газрын танхимын гишүүдэд хаягласан ил захидал зүүжээ.

Тухайлбал, Ерөнхий сайд Ч.Сайханбилэгт “Та ажилтай, орлоготой монгол хүн гэж их зарласан. Ажилтай орлоготой бүхэн ажилгүй болж сэтгэлээр унаж байна. Та эрүүл, чийрэг монгол хүн гэж их ярьсан. Эрүүл мэндийн салбар бүрэн утгаараа дампуурч, иргэд айж байна. Та эрдэм боловсролтой монгол хүн гэж их сурталчилсан. Эрдэмтэн мэргэд бүхэн гадуурхагдаж, төсвөө хасуулж байна. Та аюулгүй орчинтой монгол гэж их сэрэмжлүүлсэн. Хулгай дээрэм газар авч хүн бүхэн айдаст автаж байна. Та эрх чөлөөтэй монгол хүн гэж их рекламдсан. Эрх чөлөө хумигдаж, ардчилал алдарч иргэд бухимдаж байна. Таны ярьсан бүхнийг ард түмэн дэмжсэн. Танд хэлэх зөвлөгөө байна. Хэлсэн бүхнээ эсрэгээрээ хэрэгжүүлдгээ зогсоо. Ард түмнээ хүн шиг амьдруулж, улс шиг хөгжүүл. Эс тэгвээс ирэх жил хариуцлага тооцох болно шүү” гэжээ.

Харин Гадаад хэргийн сайд Л.Пүрэвсүрэнд “Сахилгын шийтгэл хүлээсэн анхны сайд боллоо. Сайн хөршийнхөө харилцаанд сэв суулгаж хов хутгахаа зогсоо. Эрхэм таны үед элчин сайд, консулын хэрүүл энэ Монголд багтахаа байлаа. Энэ зуны АСЕМ-ийн бэлтгэлийг сайн хангаад, ирэх оноо сайхан угтаарай” гэжээ.

Зам тээврийн сайд М.Зоригтод “Олон улсын нислэгийг хоёр дахин нэмэгдүүлнэ гэсэн юу болов? Охидын зураг дарахаа больж төрийн ажлаа сайн хий. Яамаа порно студи болгосон тухай яриа гаргасан Ганбатын гомдолд хариу өг. Төмөр замын луйврыг олон нийтэд зарлаж, шинэ оноо сайхан угтаарай” гэсэн байна.

Түүнчлэн Барилга хот байгуулалтын сайд З.Баянсэлэнгэд “Барилгын сайд та банкны захирлуудтай уулзаж учраа ол. Байрны урьдчилгааг 10 хувь болгох санаачилгыг ажил хэрэг болго. Найман хувийн зээл дээр шинэ бодлого гаргаж, УИХ-д танилцуул. Намынхныгаа биш барилгын салбараа бодож ажилла” гэжээ

Шадар сайд Ц.Оюунбаатарт “Амлалтаа биелүүлээгүй бол хариуцлага хүлээнэ гэснээ санаж ажиллаарай. Ард түмэндээ амласан таван хувьсгалаа хийж дуусгаарай. Шадар сайдын албыг өгөх шийдлээ дүгнээд, шинэ оноо шударга ёстойгоо угтаарай” гэсэн байна. Гэх мэтчилэн ил захидлыг Засгийн газрын танхимын бүх гишүүдэд илгээжээ.

Уг ил захидлуудын шүлгийг МАН-ын генсек, яруу найрагч Ж.Мөнхбат зохиосон гэх мэдээлэл мөн твиттерт цацагдаж байна.