Өнгөрсөн арваннэгдүгээр сарын 23-ны өдөр Японы Ясукуни сүмийн нийтийн бие засах газар дэлбэрэх бодис суурилуулж орхисон хэрэг гарсан. Эл хэргийг Солонгос улсын иргэн, 27 настай эрэгтэй Чон үйлдээд, эх орон руугаа буцсаныг Японы тал илрүүлжээ. Гэвч иргэн Чон нь хэрэг үйлдсэнээс 15 хоногийн дараа буюу энэ сарын 9-ний өдөр дахин Япон улс руу нэвтэрч байхдаа тус улсын цагдаа нарт саатуулагдсан аж. “Mongol radio”-гийн уламжилснаар, гэмт этгээд Ясукуни сүмд очсон боловч тэсрэх бодис суурилуулаагүй гэж мэдэгдэж байгаа бөгөөд Япон улсын хилийг дахин нэвтрэхдээ биедээ тэсрэх бодист хамаарагдах эд зүйлс авч орохыг завдсан хэрэг үйлджээ. Тиймээс Солонгос улсын иргэнийг сэтгэцийн өвчтэй нэгэн байж болзошгүй хэмээн Солонгос улсын тал үзэж буй юм байна.