Их эзэн Чингис хааны мэндэлсэн өвлийн эхэн сарын шинийн нэгэн Монгол бахархалын өдөрт зориулсан чансаа өндөр 128 бөхийн барилдаан Монгол бөхийн өргөөнд боллоо. Уг барилдааныг Монгол Улсын Ерөнхийлөгч Ц.Элбэгдорж, УИХ-ын гишүүн Чингис хааны одонт Р.Гончигдорж, Ерөнхийлөгч асан П.Очирбат, дөнгөж саяхан Чингис хааны одонгоор шагнагдаад буй СГЗ Г.Мэнд-Ооёо тэргүүтэй хүндэт зочид үзэж сонирхсон юм.
Уг барилдаанд улсын арслан П.Бүрэнтөгс, Н.Батсуурь, улсын гарьд Б.Гончигдамба, улсын заан М.Өсөхбаяр, Б.Батмөнх, Б.Соронзонболд, улсын харцага Ө.Бат-Орших, Ц.Содномдорж, Д.Батболд, А.Цацабшир, Н.Батзаяа, Б.Одгэрэл, улсын өсөх идэр начин Э.Энхбат, Ш.Уламбаяр, Р.Пүрэвдагва тэргүүтэй 128 бөх зодоглосон. Тэднээс шөвгийн дөрөвт улсын арслан П.Бүрэнтөгс, улсын заан Б.Батмөнх, улсын начин Л.Цэрэнтогтох, Хөвсгөл аймгийн харьяат аймгийн начин Ч.Хөхчирэнгэр нар үлдсэн юм.
Улсын арслан П.Бүрэнтөгс аймгийн арслан Ч.Хөхчирэнгэрийг, улсын начин Л.Цэрэнтогтох улсын заан Б.Батмөнхийг давснаар үзүүр түрүүнд үлдэв. Ингээд үзүүр түрүүг улсын арслан П.Бүрэнтөгс, улсын начин Л.Цэрэнтогтох нар булаалдлаа. Уг барилдаанд улсын арслан П.Бүрэнтөгс шуурхай шийдэмгий барилдаж түрүүллээ.