“Өдрийн сонин”-ы лхагва гаригийн дугаар хэвлэгдэн, уншигч та бүхний гар дээр очлоо. Дэлхийн банкнаас танилцуулсан Монголын эдийн засгийн тоймыг дэлгэрэнгүйгээр нь өнөөдрийн дугаартаа хүргэж байна. Тэдний таамагласнаар ирэх онд гадаадын хөрөнгө оруулалт сэргэвэл эдийн засгийн идэвхижил аажмаар нэмэгдэнэ гэсэн өөдрөг таамаглалыг гаргажээ. Харин үүний тулд хөрөнгө оруулалтын урьдчилан таамаглаж, бодлого зохицуулалтууд шаардлагатай гэсэн зөвлөмж гаргажээ. Засгийн газрын хуралдааны тойм дөрөвдүгээр нүүрт орсон бол Сонгуулийн тухай хуульд нэмэлт өөрчлөлт оруулах тухай хуулийн төсөл өргөн барьсантай холбогдуулан УИХ-ын гишүүн БОХХААБХ-ны дарга Су.Батболдын ярилцлага хоёрдугаар нүүрт орлоо. Харин тавдугаар нүүрт УИХ-ын гишүүн Ц.Нямдорж Үндсэн хуулийг өөрчлөх төслийг Их хуралд өргөн барьсантай холбоотойгоор өөрийн байр суурийг илэрхийлсэн ярилцлагыг багтаалаа. Гуравдугаар нүүрт гарсан нэрт нийтлэлч Баабарын “Улсаа нураачихалгүй сонгууль хүргэх юмсан” хэмээх нийтлэлд “ … Ардчилал өөрийн зарчимтай, дэг журамтай, үнэлэмжтэй. Сонгууль бол ардчилсан төрийг буй болгох механизм болохоос улс орноо нурааж тоглох солиорол биш шүү” гэсэн санааг энгийн, сонирхолтой бөгөөд дэлгэрэнгүйгээр нийтэлжээ. Баримт, үйл явдлын долдугаар нүүрт үүрэн телефоны дараа төлбөрт дугаар барьцаалан зээл олгоно гэх нэрийн дор хэрхэн иргэдийг луйвардаж байгаа талаарх дэлгэрэнгүй сурвалжлага болон ХХЕГ-ын Хилийн тагнуулын газрын дарга асан хурандаа нарт ТЕГ-ын мөрдөн байцаах хэлтсээс эрүүгийн хэрэг үүсгэн шалгаж эхэлсэн талаарх мэдээлэл багтлаа. Түүнчлэн байгаль орчноо хамгаалах үйлсэд сүүлийн 40 гаруй жилд зүтгэсэн Д.Бямбажавын талаар “Хүмүүс хувь тавилан” буландаа багтаасан бол зохиолч, яруу найрагч Р.Эмүжингийн “Эрх чөлөө унтлагын өрөөнд байдаг” хэмээх ярилцлага Уран бүтээлч буланд тус тус багтлаа. Түүнчлэн цаг үеийн мэдээ мэдээлэл, нийтлэл зэрэг материалууд өнөөдрийн дугаарт гарлаа.
Categories