“Өдрийн сонин” даваа гариг бүрийн өглөө “Танайд өнжье” булангаа хүргэдэг билээ. Өнөөдөр Хилийн цэргийн дуу бүжгийн чуулгын дуучин, гавьяат жүжигчин Б.Ганчимэгийнд өнжсөн тэмдэглэлээ хүргэж байна. Үлгэр эхлэх намуун үдшээр Дүүлгэр саран дор саналаа чамайгаа… хэмээх уран бүтээлээр нь түүнийг сонсогчид, уншигчид сайн мэднэ. Эрхэм уран бүтээлчийн өргөө хоймроос сурвалжилсан тэмлэглэлийг нэг, 12, 13 дугаар нүүрээс уншаарай.
Улс төрийн мэдээллийн нүүрт Хүн амын хөгжил нийгмийн хамгааллын сайд С.Эрдэнийн ярилцлага, УИХ-ын гишүүн Д.Хаянхярваагийн ярилцлага зэргийг нийтэллээ. Харин “Өдрийн сонин”-ы нийтлэлийн бодлогыг тодорхойлдог гуравдугаар нүүрт “Авлигатай тэмцэх ариун ажил улс төрийн шоу болж Монголын нийгмийг хагаралдуулах ёсгүй” нийтлэл хэвлэгдлээ.
Манай сонины эрэн сурвалжлах, тоймчдын албаны сэтгүүлч Э.Хүрэлбаатар Ханбогд суманд томилолтоор ажиллаад ирсэн юм. Монгол орны аймаг, сум бүхэнд очиж ажилласан түүний энэ удаагийн томилолт нэгэн ноцтой асуудлыг хөндөж байна. Учир нь Өмнөговь аймгийн Ханбогд суманд тэмээний үл мэдэгдэх өвчин гарч, нэлээд олон тооны тэмээ үхчээ. Эх нь үхсэн ботгонууд чөлөө завгүй буйлж, зэлээ тойрон бөн бөн нулимс унагаад малчны гадаах намрын сүүлч даанч нэг уйтай байгааг энэхүү сурвалжлагад дүрсэлжээ. Шинжлэх ухаан өндөр түвшинд хөгжсөн өнөө цагт ямар өвчин тархаад байгааг улс тогтоож чадахгүй, нэг хотны гурван гэрийн амин зуулга болсон хэдэн тэмээ хиараад дуусч байгааг, мөн энэ өвчин үхэрт халдаж байгааг нэг, 17 дугаар нүүрээс уншина уу.
Түүнчлэн Баримт, үйл явдал булангаас “Г.Шийлэгдамба сайдад авлига өгсөн гэх компанийн захирлыг шалгаж эхэлсэн бололтой” материалыг, Эдийн засаг булангаас “”Оюу толгой” төсөл энэ эрчээрээ хэрэгжвэл Монголын эдийн засаг 35 тэрбум ам.доллар болж томорно” хэмээх ярилцлагыг уншаарай.
Мөн “Орчин цагийн Ромео Жульетта нээлтээ хийх гэж байна” сурвалжлага, “Халх гол” чөлөөт бүс нь Монголын хөдөө аж ахуйг шинэ түвшинд гаргах юм” ярилцлага зэргийг өнөөдрийн дугаараас хүлээн авах боломжтой.