Цалин нэмэгдүүлэх Засгийн газар хүлээсэн үүргээ биелүүлэхгүй байгаад МҮЭХ-оос шүүмжлэлтэй хандаж, хөдөлмөрийн хамтын маргаанаа цааш үргэлжлүүлсээр байх болно гэдгээ өнөөдөр мэдэгдлээ.
Цалин тэтгэврийг нэмэгдүүлэх зорилгоор 2014 онд улсын төсөвт 500 тэрбум төгрөг суулгаж өгсөн ч төсвийн тодотголд тусгаагүй аж. Үүний дараа 2015 оны улсын төсөвт газрын тосны борлуулалтаас 90 тэрбум төгрөг цалин тэтгэвэрт төсөвлөж тус оны нэгдүгээр сарын 15-ны өдөр гурван талт хэлэлцээр байгуулсан ч мөн л хэрэгжилгүй өдийг хүрчээ. Энэ асуудлаар МҮЭХ өнгөрөгч аравдугаар сарын 14-ний өдрөөс эхлэн Хөдөлмөрийн хамтын маргааныг эхлүүлээд Засгийн Газарт хэд хэдэн удаа үүргээ биелүүлэх шаардлага хүргүүлсэн боловч өдийг хүртэл ямар ч хариу авч чадаагүй байна. Иймд Хөдөлмөрийн хамтын маргаанаа цаашид үргэлжлүүлэх шийдвэрт хүрээд байгаа юм байна. МҮЭХ-ны Ерөнхийлөгч Х.Амгаланбаатар “ Бид Монголын Засгийн газраас биелэгдэх боломжгүй зүйл шаардаагүй. Эдийн засгийн хямралтай үед төр засгаас нэмэлт зүйл хүсээгүй. Эх үүсвэртэй, үндэслэлтэй шаардлага хүргүүлсэн байгаа. Энэ асуудалд Засгийн газраас яаралтай хариу өгөхгүй бол бид хуулийн хүрээнд Хөдөлмөрийн хамтын маргааны хүнд хэлбэрт орохоос өөр аргагүйд хүрнэ” гэлээ.