Нийт 150 мянга гаруй номтой, 50 компьютертэй интернет өрөө, 17 суудал бүхий цахим номын сан, 56 суудал бүхий эрдэм шинжилгээний танхим, 42 суудалтай гадаад уншлагын танхим, 46 суудалтай тогтмол хэвлэлийн танхимаар үйлчилдэг Анагаах ухааны төв номын сан өнөөдөр нээлтээ хийлээ. Шинээр номын санг орчин үеийн номын сангийн жишигт хүргэхийг хичээн зохион байгуулсан бөгөөд сүүлийн үеийн автоматжуулалт бүхий галын дохиолол, хөдөлгөөн мэдрэгч, интернэт, гадаад болон дотоод хяналтын камер, тоон технологит суурилсан харилцаа холбооны үйлчилгээ бүхий хяналтын цогц системүүдийг байршуулжээ.
1942 онд Монгол Улсын Их Сургууль байгуулагдсан цагаас МУИС-ийн номын санд анагаахын холбогдол бүхий ном хэвлэлийг бүрдүүлж эхэлсэн. 1962 оноос АУДС бие даасан сургууль болсноор үндэс суурь тавигдсан Анагаах Ухааны Төв Номын Сан (АУТНС) нь зөвхөн АШУҮИС-ийн профессор багш, ажилтан, оюутан, судлаач төдийгүй Монгол улсын хэмжээнд эрүүл мэндийн салбарт ажиллаж буй эмч, эмнэлгийн мэргэжилтнүүдэд үйлчилдэг улсын хэмжээний анагаах ухааны чиглэлийн төв номын сан болон хөгжиж байна. Тус номын сан нь үндсэн фондоо нээлттэй үйлчилгээнд шилжүүлж байгаа анхны сан болжээ.