Өнгөрсөн нэгдүгээр сард Сонгинохайрхан дүүрэг дэх айлын хашаанаас занданшуулсан шарил олдсон бөгөөд ЦЕГ-аас Шүүхийн шинжилгээний үндэсний хүрээлэнгээс 200 жилийн настай болохыг нь тогтоосон. Түүнчлэн маш сайн хадгалагдсан гэх уг шарил 1826-1905 оны үед амьдарч байсан гэгээнтэн, аграмба Равсалын Санжайжавынх гэдгийг шинжээчид баталсан юм.
Тэгвэл уг шарилыг төрөлх нутаг болох Архангай аймагт энэ сарын 24-ний өдөр залж, бунхлахаар болжээ. Үүнд зориулж Засгийн газраас 164 сая төгрөг зарцуулахаар болсныг ч бид өмнө мэдээлж байсан. Харин шарилыг орон нутагт залахаас өмнө буюу өнөөдөр, маргааш хоёр өдөр Гандантэгчилэн хийдэд дэлгэн үзүүлж, нийслэлчүүдийг мөргүүлэх юм байна.