Олон улсын хөлбөмбөгийн холбооны ерөнхийлөгч Йозеф Блаттерын хэрэг дуулиан дагуулсаар л байна.
Түүнд эрүүгийн хэрэг үүсгэснийг Швейцарь улсын Хууль зүй, цагдаагийн яамны сайтад мэдээлжээ. Есдүгээр сарын 24-25-нд ФИФА-гийн Гүйцэтгэх хорооны хуралдааны дараа Йозеф Блаттерийг Швейцарийн Ерөнхий прокурорын газраас дуудан байцаалт авсан учир хуралдааны дараа хийхээр товлосон хэвлэлийн бага хурлыг цуцалжээ.
Йозеф Блаттер 2005 оны есдүгээр сарын 12-нд 2010, 2014 онуудын хөлбөмбөгийн ДАШТ-нийг зурагтаар дамжуулах эрх олгох тухай Карибын хөлбөмбөгийн холбоотой гэрээ байгуулж гарын үсэг зуржээ. Гэвч ФИФА-гийн ерөнхийлөгчийн үүргээ зөрчин байгууллагадаа ашиггүй гэрээ байгуулсан гэж Йозеф Блаттерийг буруутгаж байгаа билээ.
Түүнээс гадна, 1999 оны нэгдүгээр сараас 2002 оны зургадугаар сар, 2011 оны хоёрдугаар сард хийсэн ажлын хөлс гэж ФИФА-гийн хөрөнгөөс хоёр сая швейцарь франкийн хууль бус төлбөрийг УЕФА-гийн ерөнхийлөгч М.Платинид шилжүүлсэн гэж Швейцарийн Ерөнхий прокурорын газраас үзсэн бөгөөд Платини нь хоёр сая швейцарь франк авснаа хүлээн зөвшөөрчээ.