БНХАУ-ын Бээжин хотноо хөнгөн атлетикийн 2015 оны ДАШТ өчигдөр
өндөрлөлөө. Тэмцээний сүүлийн өдөр болсон эмэгтэйчүүдийн холын зайн
марафон гүйлтийн уралдаанд ОУХМ Б.Мөнхзаяа 2 цаг 45 миунт 01 секундын
хугацаанд замаа туулж, 35-р байрт оров. Нийт 67 тамирчин бүртгүүлснээс
52 нь барианд орлоо. Энэхүү уралдаанд Этиопын Дибаба Маре 2 цаг 27 минут
35 секундын амжилтаар түрүүлсэн бол Кенийн Кипроп Хела, Бахрайны Кирва
Юүнс нар мөнгө, хүрэл медаль хүртжээ. 16 тамирчин барианд ороогүй бөгөөд
тэдний дунд манай тамирчин ОУХМ Л.Отгонбаяр багтсан байна.
ДАШТ-ийг Кенийн тамирчид медалийн тоогоор тэргүүллээ. Тэд 6 алт, 5
мөнгө, 3 хүрэл медальтайгаар жагсаалтыг тэргүүлсэн бол Ямайк (7+2+3),
АНУ (6+6+6), Их Британи (4+1+2), Этиоп (3+3+2), Польш (3+1+4) II-VI
байрт оржээ. БНХАУ 1 алт, 7 мөнгө, 1 хүрэл медаль хүртсэн бол Япон,
Казахстан тус бүр нэг хүрэл медальтай буцжээ.
Дэлхийн 206 орны 2000 гаруй тамирчин өрсөлдсөн энэ удаагийн дэлхийн
аваргаас 43 орон ямар нэгэн медаль хүртжээ. Манай улсаас марафоны
уралдааны эрэгтэйчүүдийн ангилалд гавьяат тамирчин Б.Сэр-Од(38-р байр),
эмэгтэйчүүдийн төрөлд олон улсын хэмжээний мастер Б.Мөнхзаяа(35-р байр),
Л.Отгонбаяр нар оролцлоо. 2017 оны ДАШТ Английн Лондон хотноо болно.
