Хувийн хэвшлийн
компаниуд төрөөс өрөө барагдуулахыг
шаардаж хэвлэлийн бага хурал хийлээ. Учир нь төсвийн
хөрөнгөөр гүйцэтгэх бүтээн байгуулалтын ажлыг жилийн жилд хувийн хэвшлийнхэн
өөрсдийн хөрөнгөөр гүйцэтгэдэг байна. Ингээд Улсын комисс хүлээж авсны дараа
төр санхүүжилтийг нь хийх гэрээний дагуу ажиллаж байжээ. Гэвч хувийн
хэвшлийнхэнд гаргасан зардал мөнгийг нь төрөөс өнөөг хүртэл бүрэн гаргаж
өгөөгүй талаар тэд ярилаа. Тодруулбал,
200 гаруй аж ахуйн нэгж өөрийн хөрөнгөөр барилга бүтээн байгуулалтын ажил
хийсэн байна. Эдгээрээс 81 аж ахуйн нэгжийн ажлын гүйцэтгэл 80-аас дээш хувьтай
явна. Ингэхдээ компаниуд ихэвчлэн банкнаас зээл авч бүтээн байгуулалтын ажлаа
явуулдаг аж. Энэ нь эргээд ажилчдынхаа цалинг тавьж чадахгүйд хүрч улмаар үйл
ажиллагаагаа зогсооход тулжээ. Тухайлбал худаг гаргах, засварлах, услалтын
систем барих ажлыг гүйцэтгэдэг “Ус-Эрдэнэ” компани өнгөрсөн онд ХХААЯ-ны
захиалгаар Увс аймгийн Түргэн сумын Колагийн услалтын системийг барих
гүйцэтгэгчээр нь шалгарч, 322.9 сая төгрөгийн өртөгтэй барилгыг зээлээр барьж,
өнгөрсөн аравдугаар сард улсын комисст хүлээлгэн өгчээ. Гэтэл одоог хүртэл буюу
есөн сарын дараа “Ус-Эрдэнэ” компани хийсэн ажлынхаа хөлсийн 82 хувь буюу 260
орчим сая төгрөгийг төрөөс авч чадаагүй байгаа гэв.
Уг нь компаниудад төр вексель буюу өрийн бичиг бичиж өгөн наймдугаар
сарын эхэн гэхэд санхүүжилтийг нь арилжааны банкуудаар дамжуулан өгөхөөр болоод
байсан. Гэвч өчигдөр хуралдсан Төсвийн байнгын хорооны хуралдааны үеэр уг ажлыг
судлах, шалгах ажлын хэсэг байгуулж, тодорхойгүй хугацаагаар вексель бичихийг
зогсоосон юм. УИХ-ын төсвийн байнгын хорооноос гаргасан тус шийдвэрт аж ахуйн
нэгжүүдийн төлөөлөл шүүмжлэлтэй хандаж байна. Уг нь Сангийн яамнаас эхний
ээлжинд 81 аж ахуйн нэгжид 95.2 тэрбум төгрөгийн Векселиэр бичиж, холбогдох
гүйцэтгэгч компаниудад хүлээлгэн өгч, арилжааны банкуудад албан бичгээр
мэдэгдлийг хүргүүлээд байсан билээ. Тиймээс эдгээр компаниуд төрөөс өрөө барагдуулахыг шаардлаа.