Монголын шашин соёлын тэргүүн Өндөр гэгээн Занабазарт зориулан Монголын
хошуу аймаг, ноёд бүгдээр эвлэн нэгдэж, нэгэн санаа зорилготойгоор анх даншиг
наадмыг хийж эхэлсэн байдаг. Түүнээс хойш манай орон зарим харийн орны эрхшээлд
орсон хэдий ч өөрийн тусгаар тогтнол, үндэсний онцлог соёл, зан заншил, Монгол
гэсэн төрх байдаг юмаа гэдгийг илэрхийлж, хадгалж байсан хамгийн том илэрхийлэл
нь Даншиг наадам байсан тухай өчигдөр Гандантэгчэнлин хийдэд болсон хэвлэлийн
хурлын үеэр Мамба дацан хийдийн Хамба лам Д.Нацагдорж хэлж байлаа. Энэ удаагийн
Даншиг наадам цаашид дуурсагдах түүхэн үйл явдал болно гэдгийг хэлцгээж байв.
Бямба гаригийн өглөө Чингисийн талбайд санасан бүхэн нь сэтгэлчлэн бүтэж байх,
эрүүл байх, урт насалж удаан жаргах үйлсийг даатгасан номыг 500 лам уншихаар
болжээ. Ирэх амралтын өдрүүдээр болох Даншиг наадамд Халимаг, Тува, Буриад,
Европын зарим буддын шашинтнууд ирэхээр болсон бөгөөд олон хутагт хувилгаад
оролцохоор болжээ.
Мөн “Даншиг наадмын талаар нийгэмд сөрөг хандлагууд их байна. Төр шашин
хоёр нэгдэн ийм их төсөв мөнгө гаргасан наадам хийх гэж байгаад зарим иргэд
бухимдангуй байх шиг. Энэ асуудалд та ямар байр суурьтай байгаа вэ” гэхэд “Юм
шударга байхдаа сайхан. Бусад үндэстэн ястан өөрийн орны шашинд хөрөнгө
оруулалт хийдэг. Монголчууд харин устгасан болохоос дэмнэж чадаагүй.
Нөгөөтэйгүүр, Бурхны шашныг ингэж буруу өнцгөөс харж болохгүй. Бурхны шашинтан
хүмүүс үйлийн үрийн хуульд захирагддаг юм. Энэ удаа Хотын захиргаа биднийг
дэмжиж байгаад талархаж байгаа, сүсэгтэн олон ч талархах хэрэгтэй. Хотын
захиргаа тусалж дэмжээгүй бол бид үнэндээ чадахгүй шүү дээ. Санаа байгаад, ном
нь байгаад, мэдлэг нь байгаад болохгүй байна. Тийм учраас үүнийг минь дэмжээд
өгч байгаа дээр нь хоёргүй сэтгэлээр зүтгэх ёстой гэж бодон бодон хичээж байна”
хэмээн хариуллаа.