НИТХ-ын хуралдаанаар “Найрсаг Улаанбаатар” хөтөлбөрийг хэлэлцэн баталсан билээ. Энэ хөтөлбөрийн хүрээнд Улаанбаатар хот 2020 онд хоёр сая жуулчин хүлээн авч, нийслэлийн эдийн засагт аялал жуулчлалын салбарын эзлэх хэмжээг 20 хувьд, аялал жуулчлал, зочлох үйлчилгээний салбарт ажиллагсдын тоог 35 мянгад хүргэхээр зорьж байгаа юм. Харин 2030 он гэхэд таван сая жуулчин хүлээж авах тооцоотой байгаа аж.
Тиймээс ч уг хөтөлбөрийн хүрээнд иргэдэд орчин үеийн болон үндэсний урлагийн үнэт зүйлийг сурталчлах, жуулчдын тоог нэмэгдүүлэх зорилгоор энэ зун соёл урлагийн томоохон арга хэмжээнүүдийг зохион байгуулсан. Тухайлбал, “Учиртай гурван толгой дуурь”, “Ариун хаврын тахилга” этно балет, “Сайланс вайт” дижи урлагийн шоу гэх мэт тоглолтыг нийслэлчүүдэд хүргэсэн. Тэгвэл соёл урлагийн арга хэмжээ ирэх сард ч үргэлжлэх юм байна. Тодруулбал, ирэх сарын 1-нд Олон үндэстний хоолны өдөрлөг – Үндэсний соёл амралтын хүрээлэнд, 7-нд “Алдрын танхим” Рок поп хүндэтгэлийн концерт – Чингис хааны талбайд, 8-нд “Даншиг наадам, хүрээ цам” Өндөр гэгээний соёлын арга хэмжээ – Хүй долоон худагт, 8, 9-нд “Улаанбаатар фүүд” фестиваль – “Вива сити” хороололд болох юм байна.