Тулгар төрийн 2224 жил, Их Монгол Улс байгуулагдсаны 809 жилийн ой, Үндэсний их баяр наадам, Ардын хувьсгалын 94 жилийн ойн хурдан морьдын уралдаан өнөөдөр эхэлж, хязаалан шүдлэн насны уралдаан болсон билээ. Гэвч, шүдлэн насны морьдын уралдаан маргаан дагуулаад байна. Учир нь морины салбар хорооныхон энэ насанд уралдахаар бүртгүүлсэн 228 шүдлэнгийн 140 орчмыг нь эрлийз гэж үзэн хассан юм. Ердөө 90 гаруй шүдлэн л гараанаас хөдөлсөн. Үүнээс болж уяачид бухимдан шүдлэн насны уралдааныг дахиулах талаар ярилцаж байгаа гэнэ. Тэд “Монгол морио танихгүй хүмүүс хурдан морины комисст ажиллаж байна. Шүдлэн насны морьдын уралдааныг хүчингүйд тооцуулан дахин уралдуулах хүсэлт тавина” гэжээ. Мөн түүнчлэн хязаалан насанд түрүүлсэн дэд сайд Ө.Пүрэвбаатарын загал үрээ, аман хүзүүдсэн, айргийн тавд хурдалсан хүлгүүдийг эрлийз хэмээн хасах болсноос үүдэн уяачдын дунд томоохон маргаан дэгджээ.