“Өдрийн сонин”-ы 2015 оны зургадугаар сарын 02-ны дугаар хэвлэгдэн, уншигч захиалагчдадаа хүрч байна. Өнөөдрийн шинэ дугаарт гарсан материалуудаас онцлон, тоймлож хүргэе.
“Эрдэнэс таван толгой” компанийн гүйцэтгэх захирал асан Я.Батсуурь манай сонинд ярилцлага өглөө. Тэрбээр хэсэг хугацаанд баривчлагдан хоригдож байгаад батлан даалтад гарсан байгаа билээ. Батлан даалтад гарснаасаа хойш анх удаа хэвлэлд ийнхүү ярилцлага өгч байна. Тэрбээр ярилцлагадаа “Энержи ресурс компани хүнд байдалд орсон үнэнээ хэлээд, төр засгаасаа өөр хэлбэрийн дэмжлэг тусламж гуйх ёстой” гэж хэлсэн юм. Түүний Таван толгойн төсөл, “Эрдэнэс таван толгой” компани, эдгээртэй холбоотой олон асуудлаар ярьсан ярилцлагыг нэг, хоёр, тавдугаар нүүрээс уншина уу.
Мөн УИХ-ын гишүүн Л.Энх-Амгалангийн “Дэлхий ганцхан Монголыг тойрч эргэдэггүй” ярилцлагыг хоёр, дөрөвдүгээр нүүрт хэвлэлээ. Тэрбээр эдийн засгийн нөхцөл байдал болон Таван толгой төслийн талаар өөрийн байр сууриа илэрхийлсэн юм.
Өнгөрсөн амралтын өдрөөр уулын дугуйн бартаат замын тэмцээн Төв аймгийн Баянгийн даваанд болсон билээ. Энэ тэмцээнээс хийсэн “Өдрийн сурвалжлага”-ыг нэг, зургадугаар нүүрээс уншаарай. Уралдаанд 25 тамирчин, гурван төрлөөр ур чадвараа сорьсон бөгөөд энэ төрлийн спортын онцлог, дугуйн спортоор хичээллэдэг иргэдийн сонирхлыг татах давуу талуудыг сурвалжлан нийтэлж байна.
Нийслэлийн худалдан авах ажиллагааны газрын дарга Ю.Идэрцогтын ярилцлага “Баримт, үйл явдал” буланд хэвлэгдлээ. Түүнчлэн ирээдүйд эрчим хүч ямар байх, эрчим хүчний асуудлыг хэрхэн шийдэж болох талаарх Билл Гэйтсийн саналыг манай сэтгүүлч “Цаг үе” буланд нийтлэн хүргэж байна. 12 дугаар нүүрээс тольдоорой.
Халхын анхдугаар богд Өндөр гэгээн Занабазарын талаар эрдэмтэд ном хаялцсан тухай өнөөдрийн дугаараас уншиж болохоос гадна спортын ертөнц дэх нэгэн дуулианы тухай ч нийтлэв. Авлигын “эх орон”-д дэгдсэн үймээн хаанаас эхлээд, юу болоод байгаа тухай 13 дугаар нүүрт хэвлэсэн ба, “Авлигын эх орон” гэж нэрлэгдээд, цоллогдоод байгаа газар бол Олон улсын хөлбөмбөгийн холбоо буюу FIFA юм. Хэдхэн өдрийн өмнө FIFA-д жигтэйхэн том дуулиан дэгдэж, дэлхийн хэвлэлүүдээр баахан бичсэн. Ер нь энэ холбоотой хамаатай маш их мөнгө, авлигын асуудал сөхөгдөж байдаг. Хүн төрөлхтний их спорт болсон хөлбөмбөгийн ертөнцөд яагаад үе үе ийм дуулиан дэгдээд байдаг юм бэ, энэ тухай манай сонин нийтэлсэн юм.
“ӨДРИЙН СОНИН” ӨГЛӨӨ БҮХНИЙ УРГАХ НАРНААР ТАНТАЙ ХАМТ