УИХ дахь Ардчилсан намын бүлгийн үдээс хойшхи хуралдаан өндөрлөөд байна. Бүлгээр Тавантолгойн асуудлыг хэлэлцсэн тул Монгол Улсын сайд М.Энхсайхан оролцсон юм. Тэрээр гэрээний төсөлтэй холбогдуулж гишүүдийн асуултад хариулт өгчээ. Гэхдээ гишүүд Тавантолгойн гэрээнд саналаа нэгтгээгүй тул маргааш бүлэг 16.00 цагт дахин хуралдахаар болсон байна.
Тус бүлгийн хувьд үдээс өмнөх хуралдаандаа “Эрдэнэс тавантолгой” компанийн захирал асан Я.Батсуурийг оролцуулж компанийн үйл ажиллагаатай холбоотой мэдээллийг авсан юм. Өмнөх Засгийн газрын үед “Эрдэнэс тавантолгой” компани нь Хятадын “Чалько” компанитай гэрээ байгуулж, 350 сая ам.доллар зээлж авсан бөгөөд энэ өрийг Тавантолгой ордоос олборлосон нүүрсээр дарах юм. Гурван жил орчмын хугацаанд нүүрсээ нийлүүлсэн ч одоогоор 100 гаруй сая ам.долларын өр үлдсэн байгаа аж. Уг нь энэ өрийг өнгөрсөн жилийн үндэсний их баяр наадмын дараахан төлж дуусгах төлөвлөгөөтэй ажилласан ч дэлхийн зах зээлд нүүрсний үнэ унасан нь “Эрдэнэс тавантолгой” компани олборлолтоо хэчнээн нэмэгдүүллээ ч өр дарах хэмжээнд дорвитой ашиг олоогүй аж. Энэ мэтчлэн олон асуудлыг өнөөдрийн хуралдаанаар хэлэлцсэн мэдээлэл байна.