УИХ дахь Ардчилсан намын бүлгийн хуралдаан Төрийн ордны “А” танхимд үргэлжилж байна. Тус бүлэг үдээс өмнө хуралдахдаа Тавантолгойн гэрээний төслийг хэлэлцсэн ч үдээс хойш үргэлжлүүлэхээр болсон юм. Дээрх асуудлыг хэлэлцэж байгаатай холбоотойгоор Монгол Улсын сайд М.Энхсайхан бүлгийн хуралд оролцож байна.
Үдээс өмнөх бүлгийн хуралдаанд “Эрдэнэс тавантолгой” компанийн захирал асан Я.Батсуурь оролцсон юм. Түүнийг бүлгийн хуралд оролцсон шалтгааныг “Эрдэнэс тавантолгой” компанийн үйл ажиллагаатай холбоотой мэдээлэл өгсөнтэй холбон тайлбарлаж байна. Учир нь шинээр томилогдсон “Эрдэнэс тавантолгой” компанийн захирал Ч.Сайнбилэг нь ажлаа аваад удаагүй тул экс даргаас мэдээлэл авахаас аргагүй байсан аж.
Онцлоход, УИХ дахь МАХН-МҮАН-ын “Шударга ёс” эвслийн бүлэг өнөөдөр үдээс хойш хуралдах чиг бариад байсан ч хуралдсангүй. Энэ нь ажлын хэсгийн хуралдаан давхацаж, зарим гишүүн бүлгийнхээ хуралд оролцох боломжгүй байсан тул хойшлуулжээ.