Дорнод аймгийн Матад сумын Эрдэнэбадрах багийн нутаг “Петро Чайна Дачин Тамсаг” ХХК-ийн олборлолтын 19 дүгээр талбайгаас баруун урагш 8 км зайд өчигдөр өдөр хээрийн түймэр гарсан гэнэ. Түймрийг унтраахаар тус аймгийн Онцгой байдлын хэлтсийн 12 албан хаагч, 1 автомашин, ОБЕГ-ын АТА-ийн 12 албан хаагч, 1 автомашин, “Петро Чайна Дачин Тамсаг” ХХК-ийн 60 ажилтан, 10 автомашин, Хилийн цэргийн 0198 дугаар ангийн 15 албан хаагч, 2 автомашин, Матад сумаас 9 иргэн, 1 автомашин, Халх гол сумаас 63 хүн, 6 автомашин, нийт 171 хүн 21 техник хэрэгсэлтэйгээр ажиллажээ.
Өчигдөр улсын хэмжээнд 9 ой, хээрийн түймэр гарч одоогоор дөрвөн түймрийг унтрааж, нэгийг цурманд оруулж, дөрвийг унтраахаар ажиллаж байгаа аж.
Саяхан Сүхбаатар, Дорнод аймгийг хамарсан олон мянган га-г бүрхсэн түймэр гарсан. Тиймээс хаврын улирлын хуурайшилтай энэ үед гал түймрийн аюулаас сэргийлж, татсан тамхины иш, ил гал зэрэгт сэрэмжтэй хандахыг ОБЕГ-аас анхааруулав.