“Улаанбаатар хөрөнгө оруулалт-2015” бизнес чуулга уулзалт энэ сарын 15-ны өдөр болох гэж байна. Чуулга уулзалтад Улсын Их Хурал, Засгийн газрын гишүүд, Нийслэлийн ИТХ-ын төлөөлөгчид, Нийслэлийн нутгийн захиргааны байгууллагын удирдлага, Улаанбаатар хотын худалдааны танхимын гишүүд, Олон Улсын байгууллагын төлөөлөгч, Монгол Улсад суугаа Онц бөгөөд Бүрэн эрхт Элчин сайд нар, Үндэсний баялаг бүтээгчид, хөрөнгө оруулагчид гээд 1000 орчим төлөөлөгч оролцох нь. Чуулга уулзалтаар Улаанбаатар хотын хэрэгжүүлэхээр төлөвлөж буй хөрөнгө оруулалтын томоохон төслүүдийг танилцуулж, дэлгэрэнгүй нээлттэй мэдээлэл өгөх юм байна. Тус хөтөлбөрүүдэд хувийн хэвшлийнхэн хэрхэн оролцох боломжтой талаар харилцан санал солилцохоор төлөвлөжээ. Төр-хувийн хэвшлийнхэнтэй хамтран ажиллахад нийслэлээс баримталж буй худалдан авалтын бодлого, горим, төлөвлөгөөг танилцуулна гэж зохион байгуулагчид нь хэлж байна. Чуулга уулзалтад оролцохыг хүсэгчдийг Улаанбаатар хотын Худалдааны танхимын www.ubchamber.mn цахим хуудсаар бүртгэж эхэлжээ.