Дэлхийн уур амьсгалын өөрчлөлтөөс шалтгаалан монгол орны агаарын дундаж температур 1940-2007 онд 2.1 хэмээр дулаарч, хөрсний ууршилт 118.1 хувиар нэмэгджээ. Мөн жилд унах хур тундасны хэмжээ жилээс жилд буурч байгаа нь гадаргын усны хэмжээ багасахад нөлөөлж байна.
Хот суурин газрын нэг хүнд ногдох ногоон байгууламжийн дэлхийн дундаж хэмжээ 24 квадрат метр байдаг бол манай улсын нийслэлийн хувьд энэ тоо 7,5 дахин бага байгаа байна.
Тиймээс БОНХАЖЯ “Нэг сая мод ургуулах хөдөлгөөн” эхлүүлснээ өнөөдөр зарлалаа. Энэ сарын 15-наас есдүгээр сарын 15, аравдугаар сарын 1-нээс арваннэгдүгээр сарын 1 гэсэн 2 үе шаттайгаар явагдах энэ хөдөлгөөнд иргэдийг идэвхитэй оролцохыг яамныхан уриалж байна.
Эхний үе шатанд нэг сая мод тарьж, хоёрдугаар үе шатанд тарьсан модоо нөхөн сэргээж, усалгаа хийх зэргээр өвөлжилтөнд бэлтгэх ажлыг хийх аж. Улаанбаатар хотын 9 дүүрэг, 21 аймгийн төв болон бүх сумдад хэрэгжих энэ ажлын санхүүжилтийг Ойн тухай хуулийн 30.1, 31.1 заалтын дагуу хуримтлуулсан хөрөнгө, мөн “Байгаль хамгаалах сан”, “Цэвэр агаар сан”-аас гаргахаар болжээ.