Орхон аймаг газрын нөөцийн хувьд хомсдолтой хэдий ч Баян-Өндөр сумын ЗДТГ-аас энэ онд Газар зохион байгуулалтын төлөвлөгөөний дагуу 850 өрхөд газар олгоно. Тус сумын Иргэдийн төлөөлөгчдийн хурлын 2014 оны 12 дугаар сарын 30-ны өдрийн 02 дугаар тогтоолоор энэхүү төлөвлөгөө батлагджээ.Тус олгох газрын зарим нь нөхөн олголтоор буюу олгосон газарт хуулийн хугацаанд хашаа бариагүй айл өрхийн газрыг хураан эргүүлэн олгох бол зарим газрыг шинээр эзэмшүүлэх юм.
Газар олголтыг 2012 онд газар хүссэн өргөдөл өгсөн иргэдэд олгох юм. 2012 онд нийт 8000 гаруй иргэн өргөдөл өгсний 850 иргэний өргөдөлийг ийнхүү шийдвэрлэхээр тусгажээ. Тодруулбал Яргуйт багийн хөтөл хэсэгт 516 иргэнд, Эрдэнэ багийн Чингэлийн хэсэгт 100 иргэнд нийт 616 иргэнд газрыг нөхөн эзэмшүүлэхээр шийдвэрлэжээ. Түүнчлэн иргэдэд өмнө нь эзэмшиж байгаа хашааны газрыг үнэгүй өмчлүүлэхээр тусгасан байна. 2015 онд нийт 52,53 га газрыг иргэдэд өмчлүүлэхээр төлөвлөжээ.
Дашрамд дурьдахад 2015 оны газар зохион байгуулалтын тухайн жилийн төлөвлөгөөнд хууль бусаар газар эзэмшиж, ашиглаж байгаа иргэд, аж ахуй нэгж байгууллагын үйл ажиллагааг зогсоож хуулийн дагуу холбогдох арга хэмжээг авахаар төлөвлөсөн байна.
Үүнд Эрдэнэ багийн Жаргалантын хэсэг, Дэнж багийн Нарлаг дэнж, Яргуйт багийн Овоот, Уртын гол багийн Баянталын хэсэг, Баянбулаг багийн Тоглоомын талбайн урд хэсэг зэрэг газрууд хамрагдах юм байна.
