“Цаг цагаар нэг цаддаг цагаан сараар нэг цаддаг” хэмээх үг үеэ өнгөрөөснийг Эрүүл мэнд, спортын яамны мэргэжилтнүүд сануулж байна. Цагаан сар хаяанд ирсэн энэ үед баяраар ихэвчлэн хэрэглэдэг бууз, нийслэл салат, архины калорийг тэд тооцож үзжээ. Учир нь Монголын хүн амын дунд илүүдэл жин, таргалалт сүүлийн жилүүдэд эрчтэй нэмэгдэж, 54,4 хувьд хүрчээ.Энэ нь хоёр монгол хүний нэг нь илүүдэл жинтэй байна гэсэн үг юм. Сар шинийн баярын гол зоогуудын илчлэгийг тооцвол дунд зэргийн бууз ойролцоогоор 200 хүртэл ккал, жижиг дийзтэйнийслэл салат 260 ккал, 50 грамм цагаан архи 115 ккал гэж тооцжээ.
Монголчууд золголт хийж явахдаа өдөрт хамгийн багадаа гурван айлаар орж, айл болгонд 3-5 бууз, нэг таваг салат идэн гурван хундага архи тогтоолоо гэж үзэхэд тэр өдөртөө хамгийн багадаа 4000 ккалори илчлэгийг хоол хүнсээрээ авна гэсэн үг юм.
Гэтэл эрүүл мэндийн байгууллагын зөвлөмжөөр эрүүл чийрэг дундаж насны эрэгтэй хүний хоногт дунджаар авах илчлэгийн хэмжээ 2500ккал, эмэгтэй хүнийх 2000ккал байдаг. Тэгэхээр дээр тооцсон илчлэгийн хэмжээг эрүүл мэндийн байгууллагын зөвлөмжтэй харьцуулбал хоёр дахин их гарна гэж ЭМСЯ-ны Нийгмийн эрүүл мэндийн хэлтсийн мэргэжилтэн Д.Ганзориг тайлбарлав.
Шатаагаагүй 3500 калори болгон 420 гр-аар жинг (өөх) нэмэгдүүлдэг байна. Хүн биеийн жингээ тогтмол барихын тулд өдөрт дор хаяж 250 калори илчлэг шатаах хэрэгтэй гэнэ. Энэ нь дунджаар 30 минут алхсантай дүйцэх юм.
Б.ЭГШИГЛЭН