Монголын Үндэсний сагсан бөмбөгийн холбооноос гурав дахь жилдээ зохион байгуулж буй Супер лигийн тэмцээний бүх оддын тоглолт энэ сарын 30, 31, хоёрдугаар сарын 1-ний өдөр Буянт ухаа спорт цогцолборт болно. Энэ талаар Супер лигийн шилдэг тамирчин, дасгалжуулагчид хэвлэлийн хурал хийлээ. Бүх оддын тоглолтын эхний өдөр оюутны шигшээ багийн тамирчид залуу легионер тамирчдын эсрэг халз тулаан хийх бол энэ үеэр слэм данкын сонирхолтой тэмцээнийг үзэх боломжтой аж.
Тэгвэл хоёр дахь өдөр Үндэсний супер лигийн дасгалжуулагчдын санал дээр үндэслэн шалгарсан лигийн “Одод” тоглогчид энэ удаа хоёр баг болон ур чадварын тэмцээн, холын зайн шидэлт, багийн тэмцээн, бүх оддын тэмцээн, слэм данк төрлүүдээр өрсөлдөх гэнэ. Харин тэмцээний гурав дахь өдөр гал гарсан тоглолтууд гарна гэдгийг ам бардам хэлцгээж байлаа. Учир нь Монгол Улсын шигшээ багийн тамирчид легионер тамирчдын эсрэг тоглох юм. Анх Супер лиг эхэлж байхад легионеруудын баг хожиж байсан бол өнгөрөгч онд манай баг легионеруудыг буулган авсан. Энэ удаагийн тоглолт хайнаа хагалах чухал тоглолт болох юм.
Э.ЭНХ