Багануур, Налайх дүүрэгт иргэдийн оролцоотойгоор хот байгуулах санал асуулга өнөөдөр 7 цагаас эхэллээ. Налайх дүүргийг хот болгох иргэдийн санал асуулгад Нийслэлийн засаг даргын тамгийн газрийн дарга Ё. Гэрэлчулуун хүрэлцэн ирж санал хураалтын явцтай танилцаж, Налайх дүүргийг хот болгох талаар санал хүсэлтээ илэрхийлсэн юм.
Өмнө нь 2006 оноос эхлэн Багануур, Налайх дүүргийн иргэд нийслэлийн алслагдсан дүүргийг бие даасан хот болгох асуудлыг хөндөж, нийслэлийн үе үеийн удирдлагуудад санал тавьж байжээ. Улаанбаатар хотыг 2020 он хүртэл хөгжүүлэх ерөнхий төлөвлөгөөний тодотгол, 2030 он хүртэлх хөгжлийн чиг хандлагын баримт бичиг, нийслэлийн Засаг даргын 2013-2016 оны үйл ажиллагааны хөтөлбөрт нийслэлийн нутаг дэвсгэрийн тэнцвэрт хөгжлийг хангах, Улаанбаатар хотын хэт төвлөрлийг сааруулах зорилтын дагуу энэхүү санал асуулгыг явуулж байгаа юм байна.
Налайх дүүрэгт санал өгөхөөр нийт 19510 хүн бүртгэгдээд байгаа юм. Налайх дүүрэг 34575 хүн амтайгаас 18-аас дээш насны 19510 хүн энэхүү санал асуулгад оролцох юм. Өглөөний 9 цагийн байдлаар 495 хүн санал өгч, ирц 2.5 хувьтай байсан бол 11 цагийн байдлаар 1426 хүн санал өгч, ирц 7.3 хувьтай байна. Харин Багануур дүүргийн хувьд 11 цагийн байдлаар 1826 хүн саналаа өгч, ирц 11.24 хувьтай байна. 13 цагийн байдлаар 19510 иргэний 15,5 хувь буюу 3029 нь санал өгөөд байгаа юм. Санал асуулгын талаарх дараагийн мэдээлэл 15 цагаас гарах бөгөөд санал асуулгын дүнг хоёр цаг тутамд мэдээлэх ажээ.
Налайх дүүрэгт хот байгуулах санал асуулгын талаар Налайх дүүргийн засаг дарга Х.Болдбаатар хэлэхдээ:
-“1992 онд Налайхыг дүүрэг хэмээн нэрлэх болсон. Харин өнөөдөр Налайх дүүргийг Налайх хот болгох санал асуулга болж байна. Налайх дүүрэг хот болсноор Налайх дүүргийн ард иргэдийн амьдралд маш том өөрчлөлт орно. Түүнчлэн өөрсдөө эдийн засгийнхаа бүх асуудлыг шийддэг болж бүх л үйл ажиллагаагаа эндээ шийдвэрлэх боломжтой болно. Энэний үндсэн дээр эдийн засаг, нийгмийн хөгжил, аялал жуулчлал, аж үйлдвэрийн паркууд хөгжих бүрэн бололцоотой” гэж хэлсэн юм.
1993 оноос хойш Монгол Улсад хот бий болоогүй бөгөөд Налайх дүүргийн ард иргэд Налайх дүүргийг хот болгох санал асуулгыг дэмжиж байгаагаа хэлсэн юм. “Налайх дүүргийг хот болгохыг 100 хувь дэмжинэ. Энэ дүүрэг маань хот болсноор цаашдаа илүү их өргөжин дэвших болно. Налайхыг хот болгохын тулд хандив цус өгөхөд ч бэлэн байна” хэмээн Налайх дүүргийн оршин суугч, тайжийн 11/7 амьдардаг Б. Даш хэлсэн юм.
Налайх дүүргийг хот болгох иргэдийн санал асуулга өнөөдөр 21 цаг хүртэл үргэлжлэх бол Багануур дүүргийн хувьд санал асуулга 22-ны 20 цаг хүртэл үргэлжилнэ.