Нийслэлийн онцгой байдлын газраас мэдээлснээр иргэн, аж ахуйн нэгж, байгууллага зөвшөөрөлгүйгээр пиротехникийн хэрэгслийг худалдаалж байвал мэдээллийг цагдаагийн байгууллагын 102, НОБГ-ын 101 буюу 262248 дугаарын утсаар өгөх боломжтой аж. Холбогдох газруудаас очиж тухайн пиротехникийн хэрэгслийг хураан авч улсын орлого болгох, захиргааны арга хэмжээ тооцох гэнэ.
Учир нь Нийслэлийн Иргэдийн Төлөөлөгчдийн Хурлын 2010 оны 27 дугаар тогтоол, нийслэлийн Засаг даргын 2009 оны 662 дугаар захирамжаар нийслэлийн нутаг дэвсгэрт пиротехникийн хэрэгсэл ашиглах, худалдан борлуулахыг хориглосон байдаг. Тиймээс пиротехникийн хэрэгсэл худалдан борлуулдаг эрх бүхий зөвшөөрөлгүй аж ахуйн нэгж, байгууллага, иргэд пиротехникийн хэрэгслийг хадгалсан, худалдан авсан, худалдсан, ашигласан тохиолдолд хураан авч улсын орлого болгох, холбогдох хуулийн дагуу хариуцлага хүлээлгэх юм. Өнгөрсөн оны баяраар “Очир-Ундраа”,”Протек” хоёр компанид салют болон пиротехникийн хэрэгслийг худалдах зөвшөөрлийг олгож, тухайн газрын мэргэжлийн ажилтнууд буудлагыг гүйцэтгэж байсан. Мөн гар дээрээс худалдан авах явдлыг таслан зогсоож, хяналт тавьж ажилласнаар иргэд бэртэж гэмтэх, амь насаа алдах тохиолдол гараагүй. Шинэ жилийн баяр болохтой холбогдуулан салют, пиротехникийн хэрэгслийг зөвшөөрөгдсөн газраас худалдаж авах, мэргэжлийн хүмүүсээр буудлага хийлгэх шаардлагатайг мэргэжлийн байгууллагаас зөвлөж байна.