Өмнөд Солонгосын реппер Psy-гийн дуулсан “Gangnam Style” дуу энэ долоо хоногт бүх цаг үеийн хамгийн их хүн үзсэн клип гэсэн Гиннесийн амжилтаа шинэчлэн тогтоолоо. Энэхүү өвөрмөц уран бүтээлийг дэлхий даяар хоёр тэрбум 157 мянган хүн үзэж дээд амжилтыг тогтоогоод байгаа билээ. Үүний зэрэгцээ “Gangnam Style”-ийг шүүмжлэгчид ч багагүй байдаг аж. “Youtube”-д л гэхэд нэг сая гаруй хүн дислайк дарсан байх юм. Psy энэхүү дуугаа 2012 оны долоодугаар сард олны хүртээл болгож байсан билээ.
Тэгвэл саяхан уг дуутай холбоотой бас нэгэн сонирхолтой тооцоо гарчээ. Дөрвөн минут 12 секунд үргэлжилдэг клипийг үзсэн хүмүүсийн тоогоор үржүүлвэл нийтдээ 140 сая цаг буюу 16 мянган жилтэй тэнцэх гэнэ.
Хамгийн сонирхолтой нь 16 мянган жилийг хүн цагт шилжүүлэн тооцвол бид энэхүү бичлэгийг үзсэн хугацаанд хэдэн ширхэг барилга байгууламж барьж дуусгах байсныг гаргасан байна. Уг тооцоогоор хүн төрөлхтөн Нью-Йорк дахь аварга том байгууламж болох “Empire State Building”-ийг 20 ширхэг, Бурж Халифаг зургаан ширхэг гэх мэтээр сонирхолтой дүгнэлт гарах аж.