Олон улсын хөнгөн атлетикийн холбоодын эвсэл (IAAF) 2014 оны шилдэг хөнгөн атлетикчдийг нэрлэн шагнажээ.
Энэ жилийн шилдэг хөнгөн атлетикчдээр Францын тулгууртай харайлтын тамирчин Рено Лавиллени (Renaud Lavillenie) Шинэ Зеландын бөөрөнцөг түлхэгч Валери Адамс (Valerie Adams) нар шалгарлаа.
Ямайкийн гүйлтийн тамирчин “Цахилгаан” хочит Усейн Болт (Usain Bolt) оны шилдгийн төлөө өрсөлдсөн 10 хүний жагсаалтад ч багтаж чадаагүй байна. Тэрээр 2008, 2009, 2011, 2012, 2013 онуудад шилдэг хөнгөн атлетикчаар шалгарч байсан юм.
IAAF анх 1988 оноос бий болгон жил бүр олгож байгаа шилдгийн цолыг авсан анхны франц хүн нь Лавиллени болжээ.