Монгол Улсын хэмжээнд нийт 11 мянга 798 га талбайг хамарсан зөвшөөрөлтэй 426 төвлөрсөн хогийн цэг байдаг байна. 2012 оны байдлаар жилд дунджаар 1.1 сая тонн хог хаягдал гарсны тэн хагас буюу 500-550 мянган тонн нь Улаанбаатар хотоос гарчээ. Нийслэлд өдөрт 246 тонн, жилд 90 шахам мянган тонн хог хаягдал зөвшөөрөлгүй газарт хаягддаг гэсэн тооцоо байдаг. Нийслэлийн Захирагчийн ажлын албаны тооцоолсноор Улаанбаатарт өвлийн улиралд өдөрт дунджаар 1237.2 тонн хог хаягдал гаргадаг.
Үүнээс гэр хороолол 690.8 тонн, орон сууцнуудаас 145.7 тонн, аж ахуйн нэгж байгууллага 159.9 тонн, Нарангийн энгэр, Улаан чулуут, Морингийн даваа, Цагаан давааны төвлөрсөн хогийн цэгт өдөрт 2000-2500 тонн ахуйн хаягдлыг хүлээн авч ландфил технологиор дарж устгадаг аж. Ер нь байгаль дээр хог хаягдал задрахдаа тун удаан байдаг.
Тухайлбал, шилэн лонх нэг сая жил, хөнгөн цагаан лааз 200-300 жил, хуванцар сав бараг задралд ордоггүй байна. Мөн гялгар уут 20 жил, жүрж, гадил жимсний хальс хагас жил, олс, уяа 1.5 болон түүнээс дээш жил, ноосон эдлэл таван жил хүртэл, нийлэг даавуу 40 жил хүртэл задардаггүй байна.