Буудлагын оюутны Дэлхийн аварга шалгаруулах тэмцээн Арабын Нэгдсэн Эмират улсын Аль Айн хотноо энэ сарын 8-12-ны өдрүүдэд боллоо. Тус тэмцээнд өрсөлдсөн Монгол Улсын шигшээ баг нэг мөнгө, хоёр хүрэл медалийг хүртсэн юм.
Дэлхийн шилдэг тамирчид оролцож, цэц мэргэнээ сорьсон тус тэмцээнээс Азийн аварга шалгаруулах тэмцээний хүрэл медальт, Үндэсний шигшээ баг, “Алдар” спортын хороо, “АПУ” ХК-ий тамирчин ОУХМ Энхтайваны Даваахүү хос хүрэл медалийг хүртлээ. Хийн гар бууны эрэгтэйчүүдийн дасгалд нийт 30 буудагч буудсанаас БНСУ-ын Пак Даехун түрүүлж, Чехийн Дубов Жиндвич, ОУХМ Э.Даваахүү нар мөнгө, хүрэл медаль хүртлээ. Э.Даваахүү шигшээ буудлагад 6-р байраар шалгарч 176,1 оноогоор медалийн тавцанд зогслоо. Багийн дүнгээр Польшийн баг тэргүүлж, Румын, Монгол Улсын багууд мөнгө, хүрэл медаль хүртлээ. Манай улсын багийн бүрэлдэхүүнд ОУХМ Э.Даваахүү, спортын мастер О.Төгөлдөр, спортын мастер Н.Цэрэнтогтох нар багтжээ.
Мөн эмэгтэйчүүдийн 25 метрийн спорт гар бууны дасгалд ОУХМ Т.Баярцэцэг мөнгөн медаль хүртсэн амжилтыг үзүүлэв.