Ц.Мөнхбаяр нар УИХ-д өргөн барьсан урт нэртэй хуулийг эсэргүүцэн Уул уурхайн яам болон “Централ тауэр”-т тэсрэх бодис тавьсан, төрийн ордон руу буу шийдэмтэй заналхийлж, олон нийтэд айдас төрүүлсэн хэмээн буруутгагдаж, өнгөрөсөн жилийн энэ өдөр хоригдож байжээ.
“Гал үндэстэн” холбооны удирдах зөвлөлийн гишүүд өчигдөр есдүгээр сарын 16-ний өдөр иргэний нийгмийн байгууллагууд хамтран Чингис хааны нэрэмжит төв талбайд жагсаал хийх болсон тухайгаа мэдээлсэн. Тэд жагсаалаараа эх орон, байгаль дэлхийгээ хамгаалж, бусдад сануулга өгсний төлөө буруудаж хоригдсон Ц.Мөнхбаяр нарыг шоронгоос гаргахыг уриалж, цаашид шударга ёсны төлөө тууштай тэмцэнэ. Мөн Ерөнхийлөгч Ц.Элбэгдоржид шаардлага хүргүүлж, Урт нэртэй хуулийн хэрэгжилтийн талаар эрх баригчдаас асууна гэдгээ ч хэлж байсан.