Арван жил ажиглагчийн статустай байсан Монгол Улс нь Еврази болон Зүүн Азийн улсуудаас бүрдсэн Шанхайн хамтын ажиллагааны байгууллагын (ШХАБ) бүрэн эрхт гишүүн болж магадгүй гэж БНХАУ-ын Гадаад харилцааны сайд Ван И мэдэгджээ.
“ШХАБ-ыг хөгжүүлэх асар их боломж бидэнд байна. Энэ байгууллага нь одоогоор таван ажиглагч, яриа хэлцээний гурван түнштэй” гэж тус байгууллагын 13 жилийг тохиолдуулан Бээжин хотноо хийсэн хүлээн авалтын үеэр Ван И хэлсэн юм.
“Энэ ойг тохиолдуулан Монгол Улсын Ерөнхий сайдаас бид зурвас хүлээн авсан. Үүний агуулгыг бид хараахан нарийвчлан нягтлаагүй байгаа ч сайны дохио гэж үзэж байна. 10 жил хэдийн өнгөрсөн байна. Монгол Улсад ШХАБ-ын бүрэн эрхт гишүүний статусыг олгоход бэлтгэх цаг болжээ” гэж тэрбээр нэмж хэллээ.
ОХУ, Хятад, Казахстан, Киргизстан, Тажикистан болон Узбекистан нь 2001 онд байгуулагдсан, Бээжинд төвтэй ШХАБ-ын бүрэн эрхт гишүүн юм. Аюулгүй байдлын энэ байгууллага нь гишүүн улсууд дундаа терроризм, хэт давруу үзэлтнүүд газар авахтай тэмцэхэд хүчин чармайлтаа нэгтгэж, улс төр болон худалдаа зэрэг бусад салбарт хамтран ажилладаг билээ.
Афганистан, Энэтхэг, Иран, Монгол болон Пакистан улс ажиглагчийн статустай бол, Беларусь, Шри-Ланк болон Турк улс нь тус байгууллагын яриа хэлцээний түнш юм.